11.01.2025 | 22:52
Վարչապետը առաջնահերթ է համարում խաղաղության գործընթացը, թվայնացումը և կոռուպցիայի դեմ պայքարը. ՏԵՍԱՆՅՈՒԹ
1450 քաղաքացի հատել է «կարմիր գիծը», 27-ին առաջարկվել է կորոնավիրուսի թեստ հանձնել․ Covid 19 Armenia հավելվածի տվյալները. ՏԵՍԱՆՅՈՒԹ
08.04.2020 | 10:02
Արդեն ավելի քան 34 հազար մարդ ներբեռնել է հայկական Covid- 19 Armenia հավելվածը, որը քաղաքացիներին կորոնավիրուսի նախնական բժշկական թեստավորման հնարավորություն է տալիս։ Այս մասին մեզ տեղեկացրեց Հայաստանի գլխավոր պարետ Տիգրան Ավինյանի մամուլի խոսնակ Վահան Հունանյանը։
«Նախկին հավելվածով և այս հավելվածով անցկացված թեստերը 227 հազարն են, բայց մի բան պետք է հաշվի առնել՝ 1 հավելվածով հնարավոր է թեստ անցնել մի քանի անգամ, դրա համար է թիվն այսքան մեծ։ Մոտ 1450 մարդ հայտնվել է, այսպես ասած, կարմիր գծի զոնայում։ Այդ մարդկանց զանգել են համաճարակաբանները։ 27 հոգու առաջարկվել է անցկացնել թեստ»,- ներկայացրեց Վահան Հունանյանը։
Հարցին՝ իսկ կա՞ն արդեն հաստատված դեպքեր, որոնք հավելվածի միջոցով են հայտնաբերվել, Վահան Հունանյանը դժվարացավ պատասխանել:
Covid-19 armenia հավելվածը ստեղծվել է Հայաստանում և ամբողջությամբ հայ մասնագետների աշխատանքի արդյունքն է։ Այն գործարկվել է ապրիլի 5-ին, դրա առաջնային գործառույթը օգտատիրոջ բժշկական թեստավորումն է: Մի շարք հարցերի պատասխանների արդյունքում համակարգը գնահատում է օգտատիրոջ առողջական վիճակը և անհրաժեշտության դեպքում խորհուրդ տալիս՝ ինչ քայլեր ձեռնարկել: Բացի այդ, ռիսկի գոտում հայտնված օգտատերերի հետ կապ են հաստատում պարետատան համաճարակաբանները և անցկացնում հարցազրույց, որի արդյունքում որոշվում է՝ արդյոք անձը կարիք ունի՞ հետագա բժշկական ուշադրության, թե՝ ոչ: Հավելվածը նաև ներառում է վերջին նորությունները կորոնավիրուսի դեմ պայքարի գործողությունների վերաբերյալ, առողջապահական խորհուրդներ տարբեր իրավիճակներում վարակից զերծ մնալու վերաբերյալ, ինչպես նաև կորոնավիրուսի հետ կապված վերջին վիճակագրությունը։
Նշենք, որ սրանից առաջ, կիրառվել է նմանատիպ մեկ այլ հավելված՝ AC19-ը։ Հայաստանում այն գործարկվեց մարտի 24-ին։ Փոխվարչապետի խորհրդական Սուրեն Քրմոյանը հայտարարեց․ հավելվածը տրամադրել են իրանցի գործընկերները, և հայ մասնագետների ջանքերով այն հարմարեցվել է տեղական պայմաններին։
Իրանական այս հավելվածը, սակայն, այդքան էլ միանշանակ չի ընդունվել։ Իրանի առողջապահության նախարարությունը հաղորդագրություն էր ուղարկել միլիոնավոր իրանցիների՝ հորդորելով ներբեռնել այն։ Սակայն շուտով պարզվեց, որ այն անձնական տվյալներ է հավաքում՝ անուն, հասցե, ծննդյան տարեթիվ և կարող է իրական ժամանակում հետևել օգտատիրոջ տեղաշարժին։
Հավելվածը Google Store-ում արգելափակված է․ պատճառաբանվում է, որ հավելվածը նախատեսված է հիվանդության հայտնաբերման համար, իսկ հավելվածի միջոցով հիվանդության հայտնաբերում հնարավոր չէ։
Բացի այս, բազմաթիվ մտահոգություններ են հնչել, որ հավելվածը մարդկանց տեղաշարժը ֆիքսելու և, այսպես ասած, «լրտեսելու» միջոց է։
Արդեն ապրիլի 5-ից գործարկվեց հայկական նոր հավելվածը՝ covid 19 armenia-ն, AC19 հավելվածն այլևս չի օգտագործվի, իսկ դրա տվյալների բազաները տեղափոխվել են այս նոր հավելված: Այն, ըստ Վահան Հունանյանի, անձնական տվյալների անվտանգության ռիսկեր չի պարունակում։
Անժելա Պողոսյան
