19.12.2025 | 12:18
ԱՄՆ-ը դադարեցնում է «գրին քարտի» ծրագիրը // Ուկրաինան ԵՄ-ից 90 մլրդ վարկ կստանա․ ԼՈՒՐԵՐ
Անտառային տարածքների մեծացման ծրագրով 5000 նոր աշխատատեղ կստեղծվի․ շրջակա միջավայրի փոխնախարար
Տնտեսություն
13.11.2019 | 19:19
Անտառային տարածքների մեծացման ծրագիրը 5000 նոր աշխատատեղ կստեղծի: Այս մասին նոյեմբերի 13-ին լրագրողների հետ հանդիպման ժամանակ ասաց ՀՀ շրջակա միջավայրի փոխնախարար Վարդան Մելիքյանը:
«2020-ի համար անտառային ոլորտում ամենախոշոր ծրագիրը 10 միլիոն նոր ծառերի տնկումն է, իսկ մինչ 2050 թվականը Հայաստանը մտադիր է մեծացնել անտառային տարածքներն ավելի քան 200 հազար հա տարածքով, այսինքն՝ 800-900 միլիոն ծառերի տնկմամբ: Սա խոսում է այն մասին, որ տարեկան պետք է տնկել 30 միլիոն ծառ, ինչի համար անհրաժեշտ է ներգրավել 5000 մարդու, որոնք կաշխատեն տարեկան 40-50 օր»,- ասաց փոխնախարարը։
Ըստ նրա՝ այն, որ նոր տնկված ծառերը պետք է նաև խնամվեն, նշանակում է, որ աշխատանքների մեջ ընդգրկված մարդիկ տարվա մեջ 8-9 ամիս զբաղված կլինեն։
«Տնկման վայրերը մանրակրկիտ կընտրվեն: Բացի այդ, կընդլայնվի տնկիների արտադրությունը, ինչի արդյունքում ևս հավելյալ աշխատատեղեր կստեղծվեն»,- ասաց Վարդան Մելիքյանը։
Նրա խոսքով՝ «Հայանտառի» հողերին հատկացվել է 6000 հա տարածք, իսկ ծառերը կտնկվեն այն բնակավայրերում և համայնքներում, որտեղ ոռոգման հնարավորություն կա»։
Լրագրողների հետ հանդիպման ընթացքում Վարդան Մելիքյանը նաև ձկնորսության ոլորտին անդրադարձավ, նշելով, որ օրենքն արգելում է սիգի որսը, սակայն նույն սիգի վաճառքի մասով օրենսդրական բաց կա․ «Պետք է հասկանալ, որ մարդիկ ձուկ որսում են, որովհետև իրենց ապրուստի խնդիրն են լուծում: Մենք այսօր խնդիր ունենք հստակ ֆիքսելու, թե որքան ձուկ ունենք Սևանում: Առաջիկայում կունենանք որակյալ սարքավորումներ, որոնք թույլ կտան հասկանալ, թե որքան ձուկ կա լճում: Որոշ մասնագետներ նշում են, որ այն ծավալները, որոնք հնչեցվում են, փոքր են, իրականում ավելի շատ ձուկ կա: Վերջնական պատկերն ունենալուց հետո, միգուցե, հնարավոր լինի որոշակի սահմանափակ ծավալի որս իրականացնել: Այսինքն՝ հնարավոր լինի թույլ տալ օրինական որսը ևս։ Պարզապես դաշտը պետք է կարգավորված լինի, որպեսզի չտուժեն և՛ պետությունը, և՛ քաղաքացիները»։
Նելլի Մելքոնյան
