«Այսուհետ ԿԳՄՍՆ-ն շատ խիստ չափանիշներով է ընտրելու դրամաշնորհային նախագծերը». Արա Խզմալյան. ՏԵՍԱՆՅՈՒԹ

Ի՞նչ անել, որ դրամաշնորհների տրամադրման մրցութային պայմաններում պետությունը, այնուամենայնիվ, կարողանա իրականացնել իր քաղաքականությունը։ Մենք ընտրել ենք շատ ստույգ ճանապարհ․ այնպիսի պայմաններ դնել, որոնք ճանապարհ կբացեն առավելապես պրոֆեսիոնալ հանրության համար։

Այս մասին այսօր հրավիրված ասուլիսի ընթացքում նշեց ՀՀ կրթության, գիտության, մշակույթի և սպորտի նախարարի տեղակալ Արա Խզմալյանը։

«Նախկինում գործող դրամաշնորհային պայմանների արդյունքում մեզ են դիմում շատ պատահական կազմակերպություններ, կասկածելի հեռանկար ունեցող նախագծեր, որոնց ազդեցությունը ոլորտի ու հանրային կյանքի բարելավման համար տևական չէ։ Իսկ մենք պետք է կարողանանք հստակ ձևակերպել խնդիրը և հասկանալ՝ որտեղ է պետությունը, այսինքն՝ հարկատուների ներդրումներն ինչ ոլորտներ են գնում։ Այսուհետ շատ խիստ չափանիշներով ենք ընտրելու դրամաշնորհային նախագծերը»,- ասաց փոխնախարարը։

Նրա կարծիքով՝ Մշակույթի նախարարությունը տարիներ շարունակ ստանձնել է իր ուժերից վեր սոցիալական պատասխանատվություն. «Աշխատելով բավարարել բոլորի պահանջները և աջակցել բոլորին, չենք կարողանում իսկապես արժեք ներկայացնող խմբերը, ստեղծագործությունները հանրայնացնել և դուրս բերել միջազգային շուկա։ Եվ եթե մենք ճշգրտումներ չմտցնենք մեր պայմանների մեջ, իսկ ֆինանսական ռեսուրսն անսահման չէ, չենք կարողանա նույնիսկ այդ սակավ ռեսուրսը ճիշտ բաշխել և արդյունավետ կիրառել։ Համոզված եմ՝ ճիշտ բյուջետավորման, ճիշտ մշակութային քաղաքականության և դրամաշնորհային ճիշտ պայմաններում կկարողանանաք եղած միջոցները շատ ավելի արդյունավետ օգտագործել ու բազմապատկել՝ արդյունքի տեսանկյունից»։

Խզմալյանը նշեց, որ դրամաշնորհների նոր պայմանները կհրապարկվեն նոյեմբեր-դեկտեմբեր ամիսներին։ Նրա խոսքով՝ ԿԳՄՍՆ-ն առաջնահերթություն է տալու բոլոր այն նախագծերին, որտեղ հստակ կլինի կրթական բաղադրիչը․ «Դրամաշնորհները երկու փուլով կանցկացնենք․ սկզբում հայտը կուսումնասիրենք, հետո հեղինակներին կհրավիրենք շնորհանդեսի, որի ընթացքում հանձնաժողովի անդամները նրանց հարցեր կուղղեն՝ հասկանալու ծրագրի նրբությունները։ Դրամաշնորհների մեջ շատ խիստ է դրվելու այն հարցը, թե տվյալ նախագիծն ինչ տևական ազդեցություն է ունենալու երկրի ճանաչելիության, միջազգային վարկանիշի բարձրացման ու նոր կապերի հաստատման տեսանկյունից»։

ԿԳՄՍ նախարարի տեղակալը լրագրողների հետ հանդիպման ընթացքում ներկայացրեց նաև նախարարության նոր նախագծերից մեկը՝ «Դասարան+դասական»-ը։

«Այս նախագծի շրջանակում մրցութային կարգով՝ շարադրությունների հիման վրա, ավագ դպրոցներից կընտրվեն սաներ, որոնք հինգ օր Գ․ Սունդուկայնի անվան ազգային ակադեմիական թատրոնում հնարավորություն կունենան շփվել ոլորտի առաջատար մասնագետների հետ։ Նրանք կշրջեն ետնաբեմում, այնտեղից կդիտեն ներկայացումը, կլինեն դիմահարդարման սենյակում և կհասկանան, որ թատրոնը բարդ արդյունաբերություն է։ Մեր նպատակն է պատրաստել վաղվա քիչ, թե շատ պրոֆեսիոնալ հանդիսատեսին»,- ընդգծեց Արա Խզմալյանը։

Մանրամասները՝ տեսանյութում։

Նելլի Մելքոնյան