«Հրեշավոր լրահոսը» Փաշինյանի օրոք․ մեկ ասմվա ընթացքում երկու զինվոր է մահացել՝ խաղաղ պայմաններում. ՏԵՍԱՆՅՈՒԹ

Բանակում ոչ մարտական պայմաններում մահվան հերթական դեպքն է գրանցվել։ Մահացածը Բերդի զորամասի ժամկետային զինծառայող Նարեկ Գրիգորյանն է։ Նարեկը 7 ամսվա ծառայող էր, ապրում էր Արարատի մարզի Աբովյան գյուղում։ Երեկ մահացած զինծառայողի մարմինն այսօր տեղափոխվել է հայրենի գյուղ։

Նարեկ Գրիգորյանի մահվան դեպքով քրեական վարույթ է նախաձեռնվել՝ ինքնասպանության հասցնելու հոդվածով, հայտնում են ՔԿ-ից։ Գերատեսչության փոխանցմամբ՝ զինծառայողի դին հայտնաբերվել է նոյեմբերի 13-ին ժամը 09:20-ի սահմաններում՝ կախված վիճակում: Ըստ ՔԿ-ի՝ հարցաքննվել են երկու տասնյակից ավելի անձինք, առգրավվել են կարգապահական վաշտի տեսախցիկների տեսագրությունները պարունակող սարքը, փաստաթղթեր, նշանակվել են մի շարք փորձաքննություններ, նախաքննությունը շարունակվում է:

Քննչականը հայտնում է, որ Նարեկ Գրիգորյանը եղել է ՌՈ բաժնի կարգապահական վաշտում՝ չմանրամասնելով, թե զինվորն ինչո՞ւ էր այնտեղ տեղափոխվել։ Աբովյան գյուղի վարչական ղեկավարին ևս այդ մասին մանրամասներ հայտնի չեն։

Ըստ իրավապաշտպանների տվյալների՝ Նարեկ Գրիգորյանի մահը տարեսկզբից ոչ մարտական պայմաններում զինծառայողների մահվան արդեն 36-րդ դեպքն է։ Նախորդ դեպքը գրանցվել էր ուղիղ մեկ ամիս առաջ՝ հոկտեմբերի 13-ին, Ագարակի զորամասում։ Հայտնաբերվել էր ժամկետային զինծառայող Աղասի Դալլաքյանի դին։ Մայրը որդու հետ տեղի ունեցածի մասին Ֆեյսբուքից էր տեղեկացել։

Այս դեպքում էլ Քննչական կոմիտեն քրգործ է հարուցել ինքննասպանության հասցնելու հոդվածով։ Ինքնասպանության վարկածին ընտանիքը չի հավատում։ Ավելին՝ Աղասի Դալլաքյանի մայրը նշում է՝ ՊՆ-ն իր որդու մահվան ժամ է ներկայացրել 9:30-ը, բայց ինքը տղայի հետ խոսել է 9:48-ի հատվածում։

Սուրեն Պապիկյանը հոկտեմբերի 31-ին ԱԺ-ում անդրադառնալով զինվորների ոչ մարտական պայմաններում մահվան մտահոգիչ դեպքերի աճին՝ տարակուսելի բացատրություն էր ներկայացրել։ Չխոսելով բանակում միջանձնային խնդիրների և դրանց բացառման անհրաժեշտության մասին՝ պաշտպանության նախարարը նշել էր, թե զինծառայողները մահանում են քաղաքացիական կյանքում դժբախտ պատահարների պատճառով։

Մինչ նախարարը հայտարարում է, թե բարեփոխումների ուղղությամբ քայլեր են իրականացվում, մահացած զինծառայողների հարազատները պահանջում են բացահայտել մեղավորներին ու պատժել՝ այդպիսով բացառելով հետագա դեպքերը։

Նիկոլ Փաշինյանը դեռ վարչապետի պաշտոնը ստանձնելուց մի քանի ամիս առաջ էր անդրադարձել բանակում ոչ մարտական պայմաններում մահվան դեպքերին։ 2018 թվականի հունվարի 8-ին նա հայտարարել էր․ «Մենք թույլ չենք տալու, որ սա ուղղակի դառնա լրահոսի վերնագիր։ Ամեն զոհի հետևում կա կոնկրետ մեղավոր, կոնկրետ պատասխանատու, և մենք պետք է գտնենք նրանց։ Սա է այս հրեշավոր լրահոսի առաջն առնելու տարբերակը»։

Նիկոլ Փաշինյանի իշխանության մի քանի տարիների վիճակագրությունը ոչ մարտական պայմաններում զինծառայողների մահերի առնչությամբ հետևյալն է․ 2021-ին՝ 57, 2022-ին՝ 50, իսկ 2023-ին՝ արդեն 64 դեպք։

Մանրամասները՝ տեսանյութում։

Նարեկ Կիրակոսյան