Թուրքիայի կառավարությունը հետ է կանչել «օտարերկրյա գործակալների» մասին օրինագիծը քննադատություններից հետո

Թուրքիայի իշխող «Արդարություն և զարգացում» կուսակցությունը (AKP) հետ է կանչել «ազդեցության գործակալների» կամ «օտարերկրյա գործակալների» մասին օրինագիծը, որն ուղղված է «լրտեսական գործունեության դեմ» ջանքերն ուժեղացնելուն, գրում է Duvar-ը։

Գլխավոր ընդդիմադիր Ժողովրդահանրապետական ​​կուսակցության (CHP) փոխնախագահ Մուրադ Էմիրը հայտնել է այդ մասին՝ նշելով, որ դա «շաբաթների ընթացքում ժողովրդի հսկայական աջակցությամբ հանրությանն իրազեկելու ջանքերի, ինչպես նաև խորհրդարանում աշխատանքի և քննադատության արդյունքում է եղել»։

«Մենք ստացանք ընդդիմության միասնական լինելու և սոցիալական ընդդիմության բուռն արձագանքի արդյունքը։ Օրինագծի մեջ ոչ մի ռացիոնալ բան չկար, և կառավարությունը հետ է կանգնել սխալից»,- իր հերթին ասել է քրդամետ Ժողովուրդների հավասարություն և ժողովրդավարություն (DEM) կուսակցության խմբի փոխնախագահ Սեզայ Թեմելլին:

Ըստ տեղեկությունների՝ ԱԶԿ-ի ներկայացուցիչներն ասել են, որ վերամշակելու են օրինագիծը և այն կրկին կներկայացնեն խորհրդարանի քննարկմանը:

Քննադատությունների պատճառով կառավարությունը նախագիծը հետ էր կանչել 2023 թվականին։ Օրինագծով կառավարությունը նպատակ ունի նոր հանցագործություն սահմանել Թուրքիայի Քրեական օրենսգրքում՝ ուժեղացնելու ջանքերը «լրտեսական գործունեության» դեմ։

Օրինագծի համաձայն՝ «Օտարերկրյա պետության կամ կազմակերպության ռազմավարական շահերին կամ ցուցումներից ելնելով պետության անվտանգությանը կամ նրա ներքին կամ արտաքին քաղաքական շահերին ուղղված հանցագործություններ կատարողները կպատժվեն ազատազրկմամբ՝ երեքից յոթ տարի ժամկետով»։

Քննադատները հայտարարում են, որ օրինագիծը սպառնում է «լրագրողական անկախությանն ու խոսքի ազատությանը», ինչպես դա արեց կառավարությունը տխրահռչակ «ապատեղեկատվության մասին» օրենքով:

Ավելի վաղ CHP-ի առաջնորդ Օզգյուր Օզելը քննադատել էր նախագիծը և նախագահ Ռեջեփ Թայիփ Էրդողանին համեմատել Ռուսաստանի նախագահ Վլադիմիր Պուտինի հետ, որը նույնպես նման օրենքներ է ներկայացրել՝ ուղղված ընդդիմության դեմ։

Թարգմանությունը՝ Էմմա Չոբանյանի