08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Բարձր տեխնոլոգիական ոլորտում Հայաստանն ունի հզոր ներուժ՝ լինելու առաջատար. նախարար
Տնտեսություն
26.07.2019 | 14:40
ՀՀ բարձր տեխնոլոգիական արդյունաբերության նախարարությունից տեղեկացնում են, որ նախարար Հակոբ Արշակյանը ներկա է գտնվել բարձր տեխնոլոգիական ոլորտում լայն ճանաչում ունեցող «Ռենդերֆորեսթ» ընկերության նոր մասնաշենքի բացման հանդիսավոր արարողությանը։
«Ռենդերֆորեսթը» հայկական ընկերություն է, որը հնարավորություն է տալիս ստեղծելու յուրատիպ հոլովակներ, անիմացիաներ, լոգոներ, վեբ կայքեր՝ օգտագործելով մեքենայական ուսուցման և արհեստական բանականության ալգորիթմեր։ Ողջունելով ներկաներին՝ նախարար Հակոբ Արշակյանն ընդգծել է, որ բարձր տեխնոլոգիական ոլորտում Հայաստան ունի հզոր ներուժ՝ լինելու առաջատար։
«Մենք հավակնում ենք դառնալու առաջատարը բազմաթիվ ոլորտներում, որոնցից մեկը կարող է լինել արհեստական բանականությունը, մյուսը՝ միկրոէլեկտրոնիկան՝ դիզայնից մինչև արտադրություն, հաջորդը՝ մաթեմատիկան և դրա հետ կապված այլ ուղղություններ։ ՀՀ կառավարությունն այդ ուղղությամբ լուրջ քայլեր է ձեռնարկում՝ ի դեմս Բարձր տեխնոլոգիական արդյունաբերության նախարարության։
Մենք արդեն ստացել ենք բյուջեի միջնաժամկետ հաստատված ծրագիրը, համաձայն որի լուրջ ֆինանսավորում է սպասվում բարձր տեխնոլոգիական արդյունաբերության ոլորտին։ Հայաստանի պատմության մեջ նման բան չի եղել, որ այդքան մեծ գումար ուղղվի բարձր տեխնոլոգիական արդյունաբերության, հայթեքի զարգացմանը։ Եվ մենք մեծ քայլերով պետք է առաջ գնանք միասին և դառնանք տարածաշրջանային կենտրոն»,- ասել է Հակոբ Արշակյանը։
Նախարարը խոսել է նաև «Հայկական վիրտուալ կամուրջ» անվանումն ստացած ծրագրի մասին, նշել, որ տարածաշրջանային կենտրոն դառնալու համար կարևոր է հասկանալ, թե ինչ ենք տալիս այն տարածաշրջանին, որտեղ գտնվում ենք։
«Ռենդերֆորեսթի» հիմնադիր տնօրեն Նարեկ Սաֆարյանը, ներկայացնելով ընկերության անցած ուղին և ներկա գործունեությունը, նշել է, որ սկսել են հարկային արտոնություն ստանալով, հետո անցել են 30 աշխատակցի սահմանագիծը, հիմա արդեն ունեն 65 աշխատակից և նախատեսում են առաջիկայում հասնել 100-ի։
Նա ընդգծել է, որ ընկերությունն այս պահին աշխարհի խոշորագույն ավտոմատացված վիդոարտադրության պլատֆորմն է։ Հաճախորդներից են ԱՄՆ կառավարության մարմինները, «Ջեներալ էլեկտրոնիկքս»-ը, «Վոդաֆոն»-ը, «Քենոն»-ը, այլք։
Պրոդուկտն ամբողջովին նախագծվել և ստեղծվել է Հայաստանում։ Ընկերության ամբողջ կապիտալը ևս ամբողջությամբ հայկական է։ Կարևոր կետերից մեկն այն է, որ պրոդուկտի 97,8 տոկոսը արտահանվում է՝ Հայաստանը ներկայացնելով որպես բարձր տեխնոլոգիական ոլորտի խոշոր արտահանող երկիր։
«Ռենդերֆորեսթ»-ը հայկական ամենաարագ աճող ոլորտի ընկերություններից է, որն ամեն տարի 165% աճ ունի, ամսական՝ 3,5 միլիոն այցելու։
Ընկերության նոր մասնաշենքը նախատեսված է 100 աշխատակցի համար, ունի հանդիսությունների դահլիճ, գրադարան, կրթական ու հանգստի հատվածներ, բացօթյա տանիք։
«Ռենդերֆորեսթի» բրենդինգային հարթակը ներկայում ունի ավելի քան 8 մլն օգտատեր։ Այն ներառվել է 2019թ. աշխարհի 100 լավագույն ընկերությունների ցանկում»,- ասված է հաղորդագրությունում:
