14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ԳԱԱ քարտուղար Հրանտ Մաթևոսյանի առաջարկը՝ Նիկոլ Փաշինյանին. ՏԵՍԱՆՅՈՒԹ
Հասարակություն
26.03.2019 | 13:38
ՀՀ Գիտությունների ազգային ակադեմիայի տարեկան ընդհանուր ժողովի ընթացքում այսօր քննարկվեցին գիտության ոլորտի խնդիրները։ Գիտնականների ելույթի մեծ մասն ուղղված էր հնարավոր բարեփոխումներին և ֆինանսավորման մեծացմանը։ Նիստին ներկա էր նաև վարչապետ Նիկոլ Փաշինյանը։
ԳԱԱ ակադեմիկոս-քարտուղար Հրանտ Մաթևոսյանը վարչապետին ուղղված առաջարկով հանդես եկավ՝ անցնել գիտական ծրագրերի նոր մեթոդով ֆինանսավորման: Ակադեմիկոսի գաղափարը հետևյալն է՝ ընտրված բեկումնային ուղղությունների շրջանակում մեկ ընդհանուր գիտական խնդրի կամ գաղափարի շուրջ ստեղծել հետազոտական ժամանակավոր խմբեր՝ ընդգրկելով առանձին տարբեր խմբեր ու լաբորատորիաներ:
«Խմբի կազմում կընդգրկվի 5-ից 10 գիտնական: Մեկնարկը տալու համար բավական է հայտարարել նման տիպի 10-ից 15 թեմա, որոնց 30%-ը պետք է նախատեսել հատուկ երիտասարդ գիտնականների համար: Եթե այդ թեմաներն առաջարկվեն պետական պատվերի շրջանակում, դա կլինի ավելի շահավետ և նպատակասլաց։ Ծրագրի կատարողական ժամանակահատվածը կարող է տատանվել 1-ից 3 տարվա սահմաններում: Կատարողները պետք է վարձատրվեն բազային ֆինանսավորման չափաբաժիններից 3 կամ ավելի անգամ շատ»,- ասաց նա:
Հրանտ Մաթևոսյանը պնդեց, որ խոսքը մեծ գումարների մասին չէ: Դրամական միջոցները կարող են ձևավորվել 3 ճանապարհով՝ տարակարգման արդյունքում բազային ֆինանսավորումից ստացված տնտեսումներից, ամբողջովին նպատակային ֆինանսավորմամբ և մասամբ՝ թեմատիկ ֆինանսավորման գումարներով: Ըստ նրա՝ ֆինանսավորումը կիրականացվի ներկայումս հատկացվող բյուջետային ֆինանսավորման շրջանակում՝ առանց հավելյալ ֆինանսավորման:
Մանրամասները՝ տեսանյութում:
Ռոբերտ Անանյան
