03.04.2026 | 23:13
NASA-ն հրապարակել է Երկրի նոր լուսանկարը
Արարատ Միրզոյանը ՌԴ է հրավիրվել․ նախարարն ընդունել է հրավերը․ Լավրով
Քաղաքականություն
14.01.2025 | 14:09
Հայաստանի և Ռուսաստանի հարաբերությունները բարդ են, բայց երկխոսությունը շարունակվում է, իսկ մոտ ապագայում նախատեսվում է Հայաստանի արտգործնախարար Արարատ Միրզոյանի այցը Մոսկվա։ Այս մասին իր ամփոփիչ ասուլիսում ասել է ՌԴ ԱԳՆ նախարար Սերգեյ Լավրովը։
Նա նշել է, որ հայ գործընկերն ընդունել է հրավերը։
«Մեր երկխոսությունը շարունակվում է։ Արարատ Միրզոյանը հրավիրվել է Ռուսաստան։ Նա ընդունել է հրավերը։ Մենք նրան սպասում ենք, հուսով եմ՝ այցը շուտով կկայանա»,- ասել է Սերգեյ Լավրովը։
Լավրովը նաև հիշեցրել է, որ Հայաստանը չի մասնակցում ՀԱՊԿ միջոցառումներին, միաժամանակ ընդգծել, որ Երևանը չի արգելափակում կազմակերպության կողմից որոշումների ընդունումը։ Այդ պատճառով կազմակերպությունն աշխատում և գործում է։
Ինչ վերաբերում է Հայաստանի անդամակցությանը ԵՄ-ին, որի ձգտման մասին Երևանը հայտարարել է, ըստ Լավրովի՝ դա անհամատեղելի է ԵՏՄ-ին միաժամանակյա մասնակցության հետ։ Ռուսաստանցի պաշտոնյան հիշեցրել է ՌԴ փոխվարչապետ Ալեքսեյ Օվերչուկի հայտարարությունը ԵՏՄ-ի և ԵՄ-ի անհամատեղելիության մասին։
«Քանի որ դրանք երկու տարբեր ազատ առևտրի գոտիներ են, տուրքերի և մաքսատուրքերի նվազեցման կամ վերացման երկու տարբեր համակարգեր, դրանք չեն համընկնում»,- ասել է Լավրովը։
Հիշեցնենք, որ ՀՀ Կառավարությունն ավելի վաղ հավանություն էր տվել «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» ՀՀ օրենքի նախագծին:
Թարգմանությունը՝ Տաթև Ֆռանգյանի
