Էրդողանի նախագահության նոր ժամկետը «մեր օրակարգում է». Թուրքիայի իշխող կուսակցության խոսնակ

Թուրքիայի նախագահ Թայիփ Էրդողանի համար նոր ժամկետում պաշտոնավարելու համար ճանապարհ հարթելը «մեր օրակարգում է»։ Այս մասին հայտարարել է երկրի իշխող «Արդարություն և զարգացում» կուսակցության խոսնակը՝ հավելելով, որ կարևոր գործոն է այն՝ արդյո՞ք ժողովուրդը դա ուզում է, գրում է Reuters-ը։

Էրդողանը՝ ժամանակակից Թուրքիայի ամենաերկարակյաց ղեկավարն է, իշխանության ղեկին է ավելի քան երկու տասնամյակ․ սկզբում՝ որպես վարչապետ, իսկ հետո՝ նախագահ: Թուրքիայի նախագահի պաշտոնավարման ժամկետի սահմանափակման համաձայն՝ սա Էրդողանի պաշտոնավարման վերջին ժամկետն է, եթե չլինեն սահմանադրական փոփոխություններ կամ խորհրդարանն արտահերթ ընտրություններ չնշանակի։

ԱԶԿ խոսնակ Օմեր Չելիքը հայտարարել է՝ կուսակցությունն ուրախ է, որ հարցը մտել է օրակարգ։

«Սա մեր օրակարգում է, մենք կնայենք ձևաչափին։ Քաղաքականության մեջ տարին շատ կարճ ժամանակ է, օրը՝ շատ երկար։ Կարևոր է, որ մեր ժողովուրդը դա ցանկանա։ Երբ նայում ենք մեր շուրջը կատարվող իրադարձություններին, ամեն առիթով երևում է, թե որքան կարևոր է մեր նախագահի գիտելիքն ու քաղաքական կամքը մեր երկրի համար»,- հայտարարել է նա։

Նոյեմբերին MHP-ի առաջնորդ Դևլեթ Բահչելին հանդես էր եկել սահմանադրական փոփոխություններ անցկացնելու գաղափարով, որը թույլ կտա նախագահին կրկին մասնակցել 2028 թվականին նշանակված ընտրություններին:

Սահմանադրական փոփոխությունը կարող է դրվել հանրաքվեի, եթե դրան աջակցեն 600 տեղանոց խորհրդարանի 360 պատգամավորներ։ Արտահերթ ընտրությունների համար նույնպես անհրաժեշտ է 360 պատգամավորի աջակցությունը։ ԱԶԿ-ն ու նրա դաշնակիցներն ունեն 321 մանդատ։

Թարգմանությունը՝ Էմմա Չոբանյանի