Կրեմլը՝ Հայաստան-ԱՄՆ ռազմավարական գործընկերության փաստաթղթի ստորագրման մասին

Կրեմլում հայտարարել են, որ պատրաստ են շարունակել համագործակցությունը Հայաստանի հետ բոլոր ուղղություններով, իսկ Հայաստանի և ԱՄՆ-ի միջև ռազմավարական գործընկերության հնարավոր համաձայնագիրը միայն կապակայունացնի իրավիճակը Հարավային Կովկասում, գրում է Ինտերֆաքսը։

«Միացյալ Նահանգները երբեք առանձնապես կայունացնող դեր չի խաղացել Հարավային Կովկասում, կարելի է նույնիսկ հակառակն ասել: Հենց այդ գործողությունների համատեքստում է, որ ԱՄՆ-ն ամեն կերպ փորձում է ավելի ու ավելի շատ երկրների ներքաշել»,- ասել է Պեսկովը՝ լրագրողների խնդրանքով մեկնաբանելով ԱՄՆ-ի և Հայաստանի միջև ռազմավարական գործընկերության մասին համաձայնագրի կնքման հնարավոր հետևանքները։

Միաժամանակ, Կրեմլի խոսնակը հայտարարել է․ «Մեր հայ ընկերների բացարձակ ինքնիշխան իրավունքն է զարգացնել հարաբերությունները բոլոր ուղղություններով։ Մենք շարունակում ենք ելնել գլխավորից՝ մենք ունենք մեր երկկողմ հարաբերությունները Հայաստանի հետ, կարևորում ենք այդ հարաբերությունները և մտադիր ենք դրանք է՛լ ավելի զարգացնել»։

Պեսկովը նաև նշել է, որ բացի «երկկողմ ասպեկտներից՝ Մոսկվայի համար շատ կարևոր են փոխգործակցության ասպեկտները ինտեգրացիոն գործընթացների շրջանակում, այդ թվում՝ ԵՏՄ-ում»։

«Այս ամենը միասին հանդիսանում է համագործակցություն, որը զգալի դիվիդենտներ է ապահովում Հայաստանի և նրա ժողովրդի համար: Ահա թե ինչից ենք մենք ելնում»,- նշել է Կրեմլի ներկայացուցիչը:

Հավելենք, որ այսօր Վաշինգտոնում ՀՀ ԱԳ նախարար Արարատ Միրզոյանը և ԱՄՆ պետքարտուղար Էնթոնի Բլինքենը կտորագրեն Հայաստանի Հանրապետության և Ամերիկայի Միացյալ Նահանգների միջև ռազմավարական գործընկերության մասին փաստաթուղթ։

Թարգմանությունը՝ Էմմա Չոբանյանի