15.01.2025 | 02:30
Միրզոյանն ու Բլինքենը նաև քննարկել են ՀՀ-ԵՄ գործընկերության խորացմանը միտված գործընթացը
ՌԴ ԱԳՆ-ն ադրբեջանական կործանված օդանավի հետ կապված Լավրովի անունից Բայրամովին ուղղված նամակն անվանել է «կեղծիք և քաղաքական պատվեր»
Քաղաքականություն
14.01.2025 | 13:01
ՌԴ ԱԳ նախարար Սերգեյ Լավրովի կեղծ նամակը Ադրբեջանի ԱԳ նախարար Ջեյհուն Բայրամովին քաղաքական պատվեր է և «Ադրբեջանական ավիաուղիներ»-ի մարդատար օդանավի վթարը շահարկելու փորձ։ Այս մասին ասվում է ՌԴ ԱԳՆ-ի տելեգամյան ալիքում հրապարակված հաղորդագրության մեջ, փոխանցում է ՏԱՍՍ-ը։
«Համացանցում տարածվում է, այսպես կոչված, նամակ, իբր, ՌԴ ԱԳ նախարար Սերգեյ Լավրովից՝ ուղղված Ադրբեջանի ԱԳ նախարար Ջեյհուն Բայրամովին, որը գրված է անգլերեն, որում ասվում է, որ մեր երկիրը, իբր, չի կարող երաշխավորել ռուսական օդային տարածքի անվտանգ օգտագործումը։ Սա ցինիկ և կոպիտ կեղծիք է։ Տվյալ արտահոսքը պարզունակ կեղծիքի օրինակ է, որը նախատեսված է հուզական ռեակցիա առաջացնելու համար: Կեղծիքի հեղինակները պաշտոնական ատրիբուտներ էլ չեն տվել՝ ուղարկելով այն սովորական փոստային տիրույթից և սովորական էլեկտրոնային փոստի հասցեից»,-ասվում է հաղորդագրության մեջ։
Ըստ Ռուսաստանի արտաքին քաղաքական գերատեսչության՝ «ակնհայտորեն նման չարամիտ ապատեղեկատվության հետևում քաղաքական պատվեր է և փորձ՝ շահարկելու դեկտեմբերի 25-ին Ղազախստանի Ակտաու քաղաքի մոտ «Ադրբեջանական ավիաուղիների» մարդատար ինքնաթիռի կործանման թեման»։
Նշվում է, որ «ավիավթարի պատճառների հետաքննությունն իրականացվում է համապատասխան գերատեսչությունների կողմից»։ Կոչ է արվում տեղեկատվական տարածքի բոլոր պատասխանատու մասնակիցներին, առաջին հերթին՝ լրատվամիջոցների ներկայացուցիչներին և բլոգերներին, քննադատաբար վերաբերվել ցանկացած չստուգված տվյալների և նյութերի։
«Խստորեն խորհուրդ ենք տալիս լինել զգոն, չվստահել կեղծիքներին և ապավինել միայն ստուգված տեղեկատվությանը»,- ասվում է հաղորդագրության մեջ՝ հավելմամբ, որ ՌԴ ԱԳՆ պաշտոնական նյութերն ու հայտարարությունները, Սերգեյ Լավրովի ելույթների սղագրությունները և օտարերկրյա գործընկերների հետ հեռախոսազրույցների արդյունքների վերաբերյալ հաղորդագրությունները տեղադրվում են պաշտոնական կայքում և արտգործնախարարության սոցցանցերի օգտահաշիվներում»։
Թարգմանությունը՝ Էմմա Չոբանյանի
