«Գիտությունը՝ նսեմացված և կրթության սպասավոր». օրենքի նոր նախագիծը՝ դժգոհության պատճառ. ՏԵՍԱՆՅՈՒԹ

«Կրթության սպասավոր», «ստորադասված կարգավիճակ», «խտրական վերաբերմունքի զոհ». դեռ նախորդ տարվա սեպտեմբերին այս արտահայտություններով էին գիտական համայնքի որոշ ներկայացուցիչներ բնորոշում «Բարձրագույն կրթության և գիտության մասին» օրենքի նոր նախագծում գիտությանը բաժին հասած դերը։ Լրամշակման փուլ անցնելուց հետո նախագիծն այժմ Արդարադատության նախարարությունում է, փորձագիտական եզրակացություն պետք է անցնի: Գիտական համայնքում, սակայն, քննադատությունները չեն դադարում:

«Կրթության դերն էլի նսեմացվել է, եթե ընդհանրական գնահատական տալու լինեմ՝ օրենքի նախագծի տեքստի տոկոսային մասը, որը վերաբերում էր գիտությանը, շատ քիչ էր: Բացի այդ, երբ խոսք է գնում գիտահետազոտական ինստիտուտների՝ բուհերին միավորվելու մասին, տպավորություն է, որ դրանք դառնում են վերջիններիս ստորաբաժանումները»,- ասում է ՀՀ ԳԱԱ Վիկտոր Համբարձումյանի անվան Բյուրականի աստղադիտարանի տնօրեն Արեգ Միքայելյանը:

ԿԳՄՍ նախարար Ժաննա Անդրեասյանը համաձայն չէ այս պնդման հետ․ օրերս կայացած մամուլի ասուլիսի ժամանակ նախարարը հայտարարեց, որ գիտության դերն օրենքի նոր նախագծում նսեմացված չէ:

Գիտությունների ազգային ակադեմիան օրենքի նախագծի վերաբերյալ ներկայացրել էր դիտողություններ, որոնք կազմում են շուրջ 80 էջ: Ակադեմիական շրջանակներին մտահոգում է հատկապես այն դրույթը, ըստ որի՝ օրենքի ուժի մեջ մտնելուց 10 օր անց բոլոր կազմակերպությունները հանվելու են Ակադեմիայի և մյուս բոլոր գերատեսչությունների ենթակայությունից ու տրվելու են ԿԳՄՍ նախարարության ենթակայությանը՝ այն հեռանկարով, որ հետագայում պետք է տեղի ունենան բուհերի խոշորացումներ, և գիտական կազմակերպությունները պետք է միավորվեն այդ խոշորացված բուհերի հետ։

Մանրամասները՝ տեսանյութում:

Աննա Բաբաջանյան