16.01.2025 | 09:53
«Հայաստան-ԵՄ ռազմավարական գործընկերության խթանումը Վիշեգրադյան քառյակի փորձի հիման վրա». ՈՒՂԻՂ
Ինչո՞ւ Հայաստանում 2018թ.-ին կոռուպցիայի ընկալման համաթիվը չի բարելավվել․ ՏԵՍԱՆՅՈՒԹ
Քաղաքականություն
29.01.2019 | 11:00
«Կոռուպցիայի ընկալման 2018 թվականի համաթվի արդյունքները» հետազոտության համաձայն՝ Հայաստանը չի բարելավել իր դիրքերը: Հունվարի 29-ին հրավիրված ասուլիսի ժամանակ հետազոտության արդյունքները ներկայացրեց «Թրանսփարենսի ինթերնեյշնլ» հակակոռուպցիոն կենտրոնի (ԹԻՀԿ) ծրագրի ղեկավար Վարուժան Հոկտանյանը:
Նա նշեց, որ արձանագրած համաթվով Հայաստանը 2018 թվականին 180 երկրների շարքում կիսում էր 105-113-րդ տեղը, 2017-ին՝ 107-110-րդ: Այսինքն՝ կարելի է ասել, որ Հայաստանը մնացել է նույն տեղում, թեև սպասվում էր, որ 2018 թվականին ՀՀ-ն բավականին լավ ցուցանիշ պետք է արձանագրեր:
«Երկրի համաթիվը հաշվելու համար պետք է առնվազն երեք աղբյուր: Միջազգային հայտնի կազմակերպությունների 13 աղբյուրների հիման վրա «Թրանսփարենսի ինթերնեյշնլ»-ը հաշվում է պետությունների համաթիվը: Հայաստանի կոռուպցիայի ընկալման համաթիվը հաշվվել է 6 աղբյուրների հիման վրա: Նշեմ, որ հետազոտությունը կատարվել է 2017 թվականի և 2018-ի սկզբի վերաբերյալ, այսինքն՝ 6 ուսումնասիրություններից 5-ը ներառում է Կարեն Կարապետյանի վարչապետության ժամանակաշրջանը և միայն 1-ն է, որը վերաբերում է նոր իշխանություններին»,- նշեց Վարուժան Հոկտանյանը՝ հավելելով, որ 2020 թվականի հունվարին, երբ հրապարակվի հաջորդ հետազոտությունը, կուսումնասիրվի 2018 թվականը և նոր իշխանությունը կունենա այն գնահատականը, որը վաստակել է:
Վարուժան Հոկտանյանն ընդգծեց, որ ուսումնասիրությունը վերաբերում է ոչ թե կոռուպցիայի մակարդակին, այլ կոռուպցիայի ընկալմանը: Նա ներկայացրեց նաև կոռուպցիայի ընկալման համաթվի վերաբերյալ տարածաշրջանի երկրների դասակարգումը:
«Թուրքիան բավական նահանջ է ապրել՝ 52-ից իջել է 41 հորիզոնական, իրավիճակը շտկվել է Վրաստանում, որը 48-ից բարձրացել է 59 հորիզոնական, իսկ Հայաստանը տատանվում է 35-ի շուրջը: Մյուս երկու մեր հարևանները Հայաստանից ավելի վատ վիճակում են: Ադրբեջանը կտրուկ նահանջ է արձանագրել 6 կետով և, կարելի է ասել, 2018 թվականին ռեկորդային ցուցանիշ է արձանագրել: Իրանի դեպքում լճացման վիճակ է»,- ասաց Հոկտանյանը՝ նշելով, որ ԵՏՄ անդամ պետություններից էլ, օրինակ, Բելառուսը կտրուկ աճ է արձանագրել՝ հայտնվելով 44-րդ տեղում, թեպետ, եթե կոռուպցիայի համաթիվը 50-ից ցածր է, նշանակում է կոռուպցիան այդ պետությունում շարունակում է լուրջ խնդիր մնալ:
Մանրամասները՝ տեսանյութում
Աղավնի Սուքիասյան
