Մեծ թիվ են կազմում վարորդական իրավունքի քննությանն արտահերթ մասնակցելու հնարավորությունից օգտվողները. նախարար․ ՏԵՍԱՆՅՈՒԹ

Ընդամենը վեց ամսում վարորդական իրավունքի արտահերթ քննություններից օգտվել է 11,000 քաղաքացի՝ 16,000 անգամ, պետական բյուջե է մուտքագրվել լրացուցիչ կես միլիարդ դրամ։ Այս մասին ԱԺ-ում հայտարարեց ՔՊ-ական պատգամավոր Հայկ Սարգսյանը՝ հավելելով, որ քննություններն անցկացնող աշխատակիցները ստանում են 117,000-ից 227,000 դրամ աշխատավարձ և աշխատում են ծանր գրաֆիկով։

«Ուստի առաջարկում եմ իմ նախաձեռնության արդյունքում գոյացող տարեկան լրացուցիչ մեկ միլիարդ դրամի կեսն ուղղել այս համակարգի 218 աշխատակիցների աշխատավարձերի բարձրացմանը։ Մյուս կես միլիարդն արձագանքի ընթացքում կասեմ՝ ինչ եմ առաջարկում անել։ Սա թույլ կտա միաժամանակ լուծել երկու խնդիր՝ բարձրացնել ծառայության որակը և պահել պրոֆեսիոնալ կադրերին համակարգում։ Հարցս Ներքին գործերի նախարարին՝ պատրա՞ստ եք քննարկել այս մոտեցումը և գնալ այս ճանապարհով»,- նշեց Սարգսյանը։

ՆԳ նախարար Արփինե Սարգսյանն էլ փաստեց, որ մեծ թիվ են կազմում այն քաղաքացիները, ովքեր օգտվում են արտահերթ սպասարկման հնարավորությունից։

«Ինչ վերաբերում է աշխատավարձերին, նախ և առաջ ուզում եմ շեշտել, որ թե՛ այս դահլիճում, թե՛ նաև կառավարության շրջանակում անընդհատ քննարկում ենք և վերահաստատում ենք մեր մոտեցումը, որ չի կարելի և չպիտի լինի այնպիսի մի մոտեցում, որ որևէ կառույցի կողմից գեներացված որևէ միջոցը նպատակային կոնկրետ տվյալ կառույցի համար ծառայի։ Սա ընդհանուր պետական բյուջե է, և յուրաքանչյուր տարվա կտրվածքով պետությունն ինքն է որոշում, թե կուտակված միջոցներն ինչ ուղղությամբ և որ ռեֆորմներին որպես առաջնահերթություն պիտի ուղղվի և սպասարկի այդ առաջնահերթությունը»,- նշեց նախարարը։

Մանրամասները՝ տեսանյութում։