Ինչի՞ եք ինձ էդքան շատ փող տալիս․ Էդգար Ղազարյանը՝ ԱԺ աշխատակազմի ղեկավարին․ ՏԵՍԱՆՅՈՒԹ

Ազգային ժողովի բյուջետային քննարկումների ընթացքում պատգամավոր Էդգար Ղազարյանն ու ԱԺ աշխատակազմի ղեկավար Դավիթ Համբարյանը քննարկեցին պատգամավորական ծախսերի փոխհատուցման կարգը, ԱԺ աշխատակազմի իրավական կարգավիճակը և արտասահմանյան գործուղումների արդյունավետությունը։

Ղազարյանը բարձրացրեց պատգամավորներին օրենքով հատկացվող 250 հազար դրամ ծախսերի փոխհատուցման հարցը՝ նշելով, որ ինքը ցանկանում է ստանալ միայն այն գումարը, որի ծախսը կարող է հիմնավորել։

«Ես ձեզ դիմում էի ներկայացրել, որպեսզի օրենքով նախատեսված 250 000 դրամ պատգամավորական ծախսերի փոխհատուցման գումարներից ինձ հատկացնեք այնքան գումար, ինչքան որ ես ձեզ ներկայացնում եմ հսկիչ-դրամարկղային կտրոններով, հիմնավորումներով… բայց արդեն երրորդ ամիսն է, դուք ինձ 250 000 եք փոխանցում… ի՞նչի եք ինձ այդքան շատ փող տալիս, երբ որ օրենքը նախատեսում է, որ պատգամավորական ծախսերը պիտի հիմնավորված լինեն»,- ասաց Ղազարյանը։

ԱԺ աշխատակազմի ղեկավար պարոն Համբարյանը պատասխանեց, որ 250 հազար դրամի փոխանցումը օրենքով սահմանված պարտադիր կարգավորում է։

«9-րդ գումարման Ազգային ժողովում միայն դուք եք, որ ներկայացնում եք այդ հաշվետվությունները, որի կարիքը իրականում չկա, բայց դա ձեր իրավունքն է ներկայացնելը, որովհետև ամեն դեպքում 250 000 դրամը պետք է փոխանցվի, որովհետև դա աշխատակազմի պարտականությունն է, դա իրավունք չէ կամ քննարկման առարկա չէ, և սահմանվածը սահմանված է օրենքով»,- ասաց Համբարյանը։

Ղազարյանը հակադարձեց, որ պատգամավորական ծախսերը, իր կարծիքով, պետք է հիմնավորվեն հաշիվ-ապրանքագրերով և ՀԴՄ կտրոններով։

Քննարկման ընթացքում պատգամավորը անդրադարձավ նաև արտասահմանյան գործուղումների արդյունավետությանը՝ որպես օրինակ հիշատակելով ԱԺ փոխնախագահ Վահագն Ալեքսանյանի այցը Տանզանիա։

«Օրինակ՝ ասենք այս վերջերս Ազգային ժողովի փոխնախագահ Վահագն Ալեքսանյանը գնացել էր Տանզանիա և պատմեց, որ ինքը հանդիպել է այնտեղ Ռոբերտ Քոչարյանի կողմից խոցված առյուծի թոռների հետ: Հիմա, ասենք թե, այդ հանդիպման համար արժե՞ր, որ մենք պետական բյուջեից միջոցներ հատկացնեինք, որ Վահագն Ալեքսանյանը գնար, հանդիպեր այդ առյուծի թոռներին ու նայեր դրանց տխուր հայացքին»,- ասաց Ղազարյանը։

ԱԺ աշխատակազմի ղեկավարը պատասխանեց, որ պատգամավորների գործուղումների հաշվետվություններին հետևում են, իսկ գործուղումների հրավերները շրջանառվում են սահմանված կարգով։

Մանրամասները՝ տեսանյութում։

Եվգենյա Համբարձումյան