Ով է ստում․ Թաթոյանն ընդդեմ Պապիկյանի․ Փա՞ստ, թե՞ փուստ. ՏԵՍԱՆՅՈՒԹ

«Միասնության թևեր» նախաձեռնության ղեկավար, նախկին ՄԻՊ Արման Թաթոյանը մարտի 4-ին ահազանգել է, որ Գեղարքունիքի Կութ գյուղի ուղղությամբ ադրբեջանական զինված ուժերը նոր մարտական դիրք են տեղադրել ՀՀ տարածքում։

Ըստ Թաթոյանի՝ դիրքը տեղադրվել է հուլիսի 31-ից հետո՝ օգոստոսի 8-ին Վաշինգտոնում կայացած հանդիպմանն ընդառաջ, և վտանգում է Կութը, արոտավայրերն ու ՀՀ ԶՈՒ միջդիրքային ճանապարհները։ Ի պատասխան՝ պաշտպանության նախարար Սուրեն Պապիկյանը հերքել է այս տեղեկությունը։

«Էս ամեն ինչը, էդ հրատապ ասուլիսները, հարայ-հրոցը նրա համար են, որ ես արձագանքեմ ու իրենց զրուցակից դառնամ։ Ես շատ կարճ կպատասխանեմ՝ Ձեր նշած անձնավորությունը ստում է։ Նման բան չկա, սիրելի՛ հայրենակիցներ»,- ասել է Պապիկյանը։

Planet Lab-ի թարմացվող լուսանկարների ուսումնասիրությունը ցույց է տալիս, որ օգոստոսի 1-ին նշված հատվածում դիրք չկար, սակայն օգոստոսի 2-ից սկսվել են հողաշինարարական աշխատանքներ։ Օգոստոսի 9-ին դիրքն արդեն ստացել էր իր վերջնական տեսքը։

Google Earth-ի և կոորդինատների համադրումը հաստատում է՝ այս նոր դիրքը մասամբ գտնվում է Հայաստանի տարածքում։ Թեև Թաթոյանը նշում է Կութ գյուղի և Սոթքի հանքերի վտանգման մասին, դրանք տեսանելի են նաև ադրբեջանական նախկին ներխուժումների ժամանակ հաստատված դիրքերից։

Միջդիրքային ճանապարհն ամենալուրջ վտանգն է։ Նոր դիրքը գտնվում է հայկական միջդիրքային ճանապարհից ընդամենը 220 մետր հեռավորության վրա, ինչն ադրբեջանական զինուժին թույլ կտա, ցանկության դեպքում, հեշտությամբ խափանել հայկական ուժերի մատակարարումն ու հաղորդակցությունը։

Թեև ձմռանը տեղանքի դժվարամատչելիության պատճառով դիրքը կարող է ակտիվ չլինել, գարնանը պարզ կդառնա ադրբեջանական կողմի հետագա շարժը։

Մանրամասները՝ տեսանյութում։

Գարիկ Հարությունյան