02.03.2026 | 23:40
Հայաստանի մի շարք հասցեներում էլեկտրաներգիայի անջատումներ կլինեն
«Բուրջ Խալիֆա»-ն կառուցած Emaar-ն արդյոք կգա Հայաստան․ ՏԵՍԱՆՅՈՒԹ
Հասարակություն
02.03.2026 | 20:50
Դեռևս պարզ չէ՝ աշխարհի ամենաբարձր շենքը՝ Բուրջ Խալիֆան կառուցած Emaar Properties ընկերությունը կգա՞ Հայաստան, թե՞ ոչ։ Factor TV-ն գրավոր հարցմամբ դիմել էր Երևանի քաղաքապետարան՝ պարզելու, թե ով է իրականացնելու Նորագյուղ թաղամասի շինարարությունը։ Երևանի քաղաքապետարանից հայտնել են, որ կառուցապատողին պետք է ընտրեն ներդրողները։
Դեռ նախորդ տարի էր Երևանի քաղաքապետ Տիգրան Ավինյանը հանդիպել համաշխարհային ճանաչում ունեցող Emaar Properties-ի գործադիր տնօրեն Ահմադ Թանի Ալ Մատրուշիի հետ և քննարկել Downtown Yerevan-ի ստեղծման հայեցակարգային նախագիծը։
Հիշեցնենք, որ Նորագյուղ թաղամասում ներդրումներ իրականացնում են «ԴԻԹԻ ՔՈՆՍԹՐԱՔՇՆ» և «ԴԻԹԻ ԴԵՎԵԼՈՓՄԵՆԹ» ընկերությունները։ Քաղաքապետարանից հայտնում են, որ միայն ծրագրի հաստատումից և օտարման գործընթացների ավարտից հետո պարզ կդառնա, թե որ ընկերությունն է իրականացնելու շինարարությունը։
Շուրջ 84 հեկտար տարածքում նախատեսվում է հիմնել Downtown Yerevan բազմաֆունկցիոնալ միջազգային կենտրոն։ Նախագծով նախատեսվում է կառուցել 155 շենք՝ շուրջ 65 հազար բնակչի համար։
Երևանի փոխքաղաքապետ Լևոն Հովհաննիսյանը, անդրադառնալով շենքերի հարկայնությանը, Factor TV-ի հետ զրույցում Երևանը համեմատել էր Ճապոնիայի հետ։
Նախագիծն իրագործելու համար տարածքում եղած շինությունները պետք է քանդվեն, իսկ բնակիչները՝ փոխհատուցում ստանան։ Բայց պարզվում է՝ քաղաքային իշխանությունը դեռ չի հանդիպել Նորագյուղ թաղամասի բնակիչների հետ։
Հարցմամբ խնդրել էինք նաև տեղեկացնել, թե որքան է գնահատվելու բնակարանների մեկ քառակուսի մետրի արժեքը։ Պատասխանի համաձայն՝ փոխհատուցման գինը որոշվելու է գնահատող ընկերության կամ ընկերությունների եզրակացության հիման վրա՝ գույքի շուկայական արժեքին ավելացնելով 30%՝ նախկին 15%-ի փոխարեն։ Մասնավոր սեփականության օտարման գործընթացը կարող է սկսվել միայն այն ժամանակ, երբ Կառավարությունը տարածքը ճանաչի հանրության գերակա շահ։
Մանրամասները՝ տեսանյութում։
Արփի Հակոբյան
