«Ինտերի» 37-ամյա կիսապաշտպան Հենրիխ Մխիթարյանը «Լեչեի» դեմ ֆուտբոլի Իտալիայի առաջնության 26-րդ տուրի խաղում (2։0) գոլի հեղինակ դառնալուց հետո կիսվել է տպավորություններով։
«Ուրախ եմ թիմի ու ինձ համար, քանի որ հաղթեցինք շատ կարևոր խաղում: «Լեչեն» հեշտ մրցակից չէ, որը կազմակերպված է գործում և չի տալիս ազատ տարածություններ: Առաջին խաղակեսում մի քանի պահ ստեղծեցինք, իսկ երկրորդում ավելի հեշտ էր, քանի որ գոլ խփեցինք: Հաղթում ենք ոչ միայն փորձի հաշվին, այլև մեծ ցանկության: Բոլորս պետք է ամեն ինչ ներդնենք առաջին գոլը խփելու համար։
Ինչ վերաբերում է գոլիս, վերջին պահին որոշեցի մտնել տուգանային հրապարակ ու գրավեցի դարպասը, թեև այնտեղ պետք է լիներ Բաստոնին: Մենք միշտ պետք է միասնական լինենք, քանի որ մեկ թիմ ու մեկ ընտանիք ենք: Այժմ պետք է կենտրոնանանք հաջորդ խաղի վրա։ Լավագույնս կնախապատրաստվենք և կանենք առավելագույնը: Այդ ամենը կանենք մեր երկրպագուների աջակցությամբ»,- ակումբի մամուլի ծառայության հետ զրույցում ասել է Հայաստանի ազգային հավաքականի նախկին ավագը։
Իտալիայի ընթացիկ առաջնությունում Հենրիխ Մխիթարյանը մասնակցել է 19 հանդիպման, դարձել 2 գոլի ու 1 ասիստի հեղինակ։ «Ինտերը» 64 միավորով վստահորեն գլխավորում է մրցաշարային աղյուսակը և 10 միավոր առաջ է երկրորդ տեղում գտնվող «Միլանից»։
