13.04.2026 | 22:44
Դատարանը մերժել է Թրամփի հայցը ընդդեմ The Wall Street Journal-ի՝ Էփշտեյնի համար բացիկի շուրջ զրպարտության գործով
Սուքիասյանների պատասխանը․ ինչ է լինելու «Ռոսիա տոնավաճառի» հետ. ՏԵՍԱՆՅՈՒԹ
Հասարակություն
05.02.2026 | 20:34
30 տարի առաջ հիմնադրված «Ռոսիա» տոնավաճառի աշխատակիցներն ասօր բողոքի էին դուրս եկել․ երեկ տնօրինությունը բանավոր հայտնել է՝ պատրաստվում են վերանորոգել տարածքը, պետք է ազատեն տաղավարները։
Տոնավաճառը պատկանում է Խաչատուր Սուքիասյանի ընտանիքին։ Առևտրականների խոսքով՝ իրենց առաջարկվել է այլ տարածք «Երևան» տոնավաճառում, որը նույնպես Սուքիասյաններին է պատկանում։
Առևտրականները ստորագրահավաք սկսեցին, նաև դիմում հանձնեցին՝ այն հասցեագրելով ԱԺ պատգամավոր, գործարար Խաչատուր Սուքիասյանին ու նրա եղբորը՝ Էդուարդ Սուքիասյանին։ Առևտրականները Սուքիասյան եղբայրներից խնդրեցին կա՛մ վերանորոգումից հետո իրենց տրամադրել տաղավարներ, կա՛մ խելամիտ ժամկետ՝ տոնավաճառն ազատելու համար։
Խաչատուր Սուքիասյանի մամուլի խոսնակ Աննա Մկրտչյանը Factor TV-ի հետ զրույցում ասաց, որ տարածքի վերանորոգումը կիրականացնեն 4-5 ամիս հետո, որից հետո բուտիկներ կտրամադրեն առևտրականներին։
Մկրտչյանի խոսքից ենթադրելի է, որ, այնուամենայնիվ, միայն տոնավաճառ չի լինելու։ Բացի տոնավաճառից՝ ի՞նչ այլ բիզնեսներ կգործեն, խոսնակը փակագծեր չբացեց։
«Ռոսիա» տոնավաճառում հագուստ վաճառող Ալինա Հարությունյանն էլ ասաց, որ իրենց պահանաջները բավարարվել են՝ վերանորոգումն ամիսներ անց կսկսեն, իրենք էլ արդեն վերսկսել են աշխատանքը։
Ստացվում է՝ տոնավաճառում վերանորոգում կսկսվի խորհրդարանական ընտրություններից հետո․ այս անգամ Խաչատուր Սուքիասյանն ընտրական ցուցակում չի լինի։ Թե ինչո՞ւ է խոշոր գործարարը որոշել պատգամավոր չդառնալ, որևէ պարզաբանում չի ներկայացրել։
Ի դեպ, 2021-ին խոշոր գործարարների պատգամավոր լինելուն դեմ էր արտահայտվել Տիգրան Ավինյանը՝ այդպես էլ չընդգրկվելով ՔՊ-ի ցուցակում։ Այս ընտրություններին, երբ Խաչատուր Սուքիասյանն ու Գուրգեն Արսենյանը չեն լինելու ՔՊ ցուցակում, Տիգրան Ավինյանը տարեվերջյան իր ամփոփիչ ասուլիսում հայտարարեց, որ իր թեկնածությունը հաստատվել է։
Մանրամասները՝ տեսանյութում։
Արփի Հակոբյան
