Քաղաքական խորհրդակցություններ՝ Հայաստանի և Իտալիայի ԱԳՆ-ների միջև

Հռոմում կայացած քաղաքական խորհրդակցությունների ընթացքում Հայաստանի և Իտալիայի արտաքին քաղաքական գերատեսչությունները քննարկել են երկկողմ հարաբերությունների զարգացման ընթացքը, համագործակցության ընդլայնման հեռանկարները, ինչպես նաև Հայաստան–ԵՄ օրակարգի և առաջիկա միջազգային կարևոր միջոցառումների նախապատրաստական հարցերը։

ԱԳՆ-ի փոխանցմամբ՝ խորհրդակցությունները տեղի են ունեցել ՀՀ ԱԳ նախարարի տեղակալ Վահան Կոստանյանի և Իտալիայի ԱԳ և միջազգային համագործակցության նախարարի տեղակալ Էդմոնդո Չիրիելլիի գլխավորությամբ։

«Խորհրդակցությունների ընթացքում անդրադարձ է կատարվել վերջին տարիներին երկկողմ հարաբերությունների զարգացման դրական դինամիկային՝  ընդգծելով բարձրաստիճան շփումների նշանակալի դերը կառուցողական քաղաքական երկխոսության խթանման, տնտեսական համագործակցության հետագա ամրապնդման և ընդլայնման գործում։

Քննարկվել է երկկողմ օրակարգային հարցերի լայն շրջանակ: Կողմերն ընդգծել են մի շարք ուղղություններով, մասնավորապես՝ երկկողմ առևտրաշրջանառության ծավալների աճի, ներդրումների խթանման, բարձր տեխնոլոգիաների, զբոսաշրջության, կրթության, մշակույթի և այլ ոլորտներում համագործակցության զարգացման նպատակով համատեղ քայլերի իրագործման կարևորությունը:

Զրուցակիցները քննարկել են նաև Հայաստան-ԵՄ գործընկերության ռազմավարական օրակարգի հարցեր, ինչպես նաև 2026թ. Հայաստանում կայանալիք Եվրոպական քաղաքական համայնքի 8-րդ գագաթաժողովի և Կենսաբազմազանության մասին կոնվենցիայի կողմերի 17-րդ համաժողովի (COP17) նախապատրաստական աշխատանքները:

Նախարարի տեղակալ Վահան Կոստանյանը ներկայացրել է 2025թ. օգոստոսի 8֊ից հետո Հարավային Կովկասում  զարգացումները: Ի թիվս այլնի, ՀՀ ԱԳ նախարարի տեղակալն անդրադարձ է կատարել ընթացիկ տարվա հունվարի 13-ին ՀՀ ԱԳ նախարար Արարատ Միրզոյանի և ԱՄՆ պետքարտուղար Մարկո Ռուբիոյի հանդիպման շրջանակներում «Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախագծի` Հայաստան-ԱՄՆ իրականացման շրջանակի ընդունմանը»,- ասված է հաղորդագրությունում: