ԵՄ երկրների դեսպանները հավաքվում են արտակարգ նիստի․ պատճառը Թրամփի հայտարարությունն է

Եվրոպական առաջնորդները Դոնալդ Թրամփի՝ Գրենլանդիա զինվորականներ ուղարկած երկրների նկատմամբ մաքսատուրքեր սահմանելու սպառնալիքները համարում են անընդունելի և սխալ։

Ֆրանսիայի նախագահ Էմանուել Մակրոնը գրել է, որ Փարիզը հավատարիմ է ազգերի ինքնիշխանությանն ու անկախությանը՝ թե՛ Եվրոպայում, թե՛ դրա սահմաններից դուրս, և հենց այդ հիմքով է որոշում կայացրել միանալ Դանիայի նախաձեռնած զորավարժություններին Գրենլանդիայում։

«Ոչ մի սպառնալիք չի կարող ազդել մեզ վրա՝ ոչ Ուկրաինայում, ոչ Գրենլանդիայում, ոչ էլ աշխարհի որևէ այլ վայրում, երբ բախվում ենք նման իրավիճակների։ Մաքսատուրքերի սպառնալիքները տվյալ համատեքստում անընդունելի և անհարիր են»,-հայտարարել է Մակրոնը։ Նա հավելել է, որ եվրոպացիները «կարձագանքեն միասնական և համակարգված կերպով»։

Մեծ Բրիտանիայի վարչապետ Քիր Սթարմերը հայտարարել է, որ «ՆԱՏՕ-ի դաշնակիցների հավաքական անվտանգությունն ապահովելու համար մաքսատուրքեր սահմանելը բացարձակապես սխալ է»։

«Իհարկե, մենք այս հարցը անմիջականորեն կքննարկենք ԱՄՆ վարչակազմի հետ»,-հավելել է Սթարմերը։

Գերմանիայի կանցլեր Ֆրիդրիխ Մերցը նշել է, որ Գրենլանդիայի հարցը քննարկվում է ՆԱՏՕ-ի շրջանակում։

«Մենք կիսում ենք ամերիկյան կողմի մտահոգությունը, որ Դանիայի այս հատվածը ավելի հուսալի պաշտպանության կարիք ունի։ Հուսով եմ, որ ՆԱՏՕ-ի շրջանակում կհաջողվի հասնել փոխընդունելի լուծման»,-հայտարարել է Մերցը։

Դանիայի արտաքին գործերի նախարար Լարս Լյոկկե Ռասմուսենը Թրամփի հայտարարությունն անվանել է «անսպասելի»։

«Գրենլանդիայում ռազմական ներկայության ավելացման նպատակը, որին հղում է անում ԱՄՆ նախագահը, հենց Արկտիկայում անվտանգության բարձրացումն է»,- հավելել է նա։

Եվրամիության երկրների դեսպանները հունվարի 18-ին կհավաքվեն արտակարգ նիստի՝ կապված Գրենլանդիայի վերաբերյալ Թրամփի հայտարարությունների հետ, փոխանցում է Reuters-ը։ Նիստը հրավիրել է Կիպրոսը, որը հունվարի 1-ից նախագահում է ԵՄ խորհրդում։

Ավելի վաղ Թրամփը հայտարարել էր 10 տոկոս մաքսատուրքեր սահմանելու մասին այն ութ երկրների դեմ, որոնք իրենց զինվորականներին ուղարկել են Գրենլանդիա՝ Մեծ Բրիտանիայի, Ֆրանսիայի, Գերմանիայի, Դանիայի, Նիդերլանդների, Նորվեգիայի, Ֆինլանդիայի և Շվեդիայի։ Մաքսատուրքերը կսկսեն գործել փետրվարի 1-ից, իսկ հունիսից կբարձրանան մինչև 25 տոկոս, եթե Միացյալ Նահանգների կողմից Գրենլանդիայի գնման վերաբերյալ համաձայնություն չկայացվի։