Զելենսկիի գրասենյակի ղեկավար Անդրեյ Երմակի տանը խուզարկություն է իրականացվում

Ուկրաինայի ազգային հակակոռուպցիոն բյուրոյի (NABU) և Մասնագիտացված հակակոռուպցիոն դատախազության (SAPO) աշխատակիցները խուզարկություններ են իրականացնում Կիևում կառավարական թաղամասում երկրի նախագահի գրասենյակի ղեկավար Անդրեյ Երմակի տանը։ Այս մասին հաղորդել է «Украинская правда»-ն, փոխանցում է Meduza-ն։

Պարբերականի թղթակցի տեղեկացմամբ՝ NABU-ի և SAPO-ի շուրջ 10 աշխատակիցներ մտել են կառավարական թաղամաս։ Երմակի մոտ խուզարկությունների մասին գրել են նաև Գերագույն ռադայի պատգամավորներ Յարոսլավ Ժելեզնյակը և Ալեքսեյ Գոնչարենկոն։

Երմակի տանը խուզարկությունները պաշտոնապես հաստատվել են։

«NABU-ն և SAP-ը քննչական գործողություններ են անցկացնում Ուկրաինայի նախագահի գրասենյակի  ղեկավարի տանը։ Դրանք թույլատրվել և իրականացվում են քննության շրջանակում։ Մանրամասները կհրապարակվեն ավելի ուշ»,- ասվում է  Մասնագիտացված հակակոռուպցիոն դատախազության հայտարարության մեջ։

Նոյեմբերի 25-ին NABU-ն հարցաքննել էր Ուկրաինայի Ազգային անվտանգության և պաշտպանության խորհրդի քարտուղար Ռուստեմ Ումերովին՝ կապված «Էներգոատոմ»-ում կոռուպցիոն գործի հետ։ Նա կանչվել էր որպես վկա։

Նոյեմբերի սկզբին NABU-ն  հայտարարել էր «Էներգոատոմ» ընկերությունում, որը կառավարում է երկրի բոլոր ատոմակայանները, խոշոր չափերի հափշտակության բացահայտման մասին: Զելենսկիի նախկին գործընկեր և ընկեր Տիմուր Մինդիչը նույնականացվել է որպես սխեմայի կազմակերպիչ, իսկ բարձրաստիճան պաշտոնյաները նշվել են որպես հնարավոր շահառուներ:

Ըստ լրատվամիջոցների՝ Մինդիչը փախել է Իսրայել (նա ունի Իսրայելի քաղաքացիություն) կոռուպցիայի գործով խուզարկություններից մի քանի ժամ առաջ: Քրեական գործի նյութերում հիշատակվում է նաև Ազգային անվտանգության և պաշտպանության խորհրդի քարտուղար Ռուստեմ Ումերովը։

NABU-ի հետաքննության ֆոնին լուրեր էին տարածվել, որ Զելենսկիի հակառակորդներն ու կողմնակիցները կոչ են արել նրան ազատել Անդրեյ Երմակին։ Ուկրաինայի նախագահը հրաժարվել է դա անել։

Թարգմանությունը՝ Էմմա Չոբանյանի