07.09.2026 | 15:25
Հրդեհ Երևանյան լճին հարակից ձորում. դեպքի վայր է մեկնել երկու մարտական հաշվարկ
Ուկրաինական անօդաչուները հարվածներ են հասցրել ՌԴ-ի խոշորագույն նավթավերամշակման գործարաններից մեկին
Քաղաքականություն
14.09.2025 | 15:37
Ուկրաինայի զինված ուժերը սեպտեմբերի 14-ի գիշերը հարվածներ են հասցրել Լենինգրադի մարզում գտնվող «Կիրիշինեֆտեօրգսինթեզ» («Կինեֆ») գործարանի վրա, հայտնել է մարզի նահանգապետ Ալեքսանդր Դրոզդենկոն։
Նրա խոսքով՝ Կիրիշի քաղաքի շրջակայքում խոցվել է երեք անօդաչու։ Դրոնների բեկորների անկման հետևանքով «Կինեֆ» գործարանի տարածքում հրդեհ է բռնկվել, որը մարվել է։ Նահանգապետը նշել է, որ տուժածներ չկան։
Տելեգրամյան ալիքներում հայտնվել են ձեռնարկությունում բռնկված հրդեհի լուսանկարներ և տեսանյութեր։ Ուկրաինացի OSINT-վերլուծաբանները ենթադրել են, որ հարվածի հետևանքով վնասվել է նավթի նախնական թորանքի ԷԼՈՒ ԱՎՏ-6 կայանքը։
Ուկրաինայի ԶՈՒ Գլխավոր շտաբում հայտարարել են, որ ուկրաինական ստորաբաժանումները հարվածել են Լենինգրադի մարզի Կիրիշի քաղաքի նավթավերամշակման գործարանին, որտեղ տեղի են ունեցել պայթյուններ և հրդեհ։
Գլխավոր շտաբը նշել է, որ Կիրիշիի նավթավերամշակման գործարանը Ռուսաստանի խոշորագույններից է և «ներգրավված է ՌԴ զինված ուժերի կարիքների ապահովման գործում»։
Ուկրաինայի զինված ուժերը արդեն հարձակվել էին Կիրիշիի նավթավերամշակման գործարանի վրա 2025թ․ մարտին։
Վերջին շաբաթներին ուկրաինական անօդաչուները պարբերաբար հարձակվում են Ռուսաստանի նավթավերամշակման գործարանների վրա։ Սեպտեմբերի 13-ին հարվածի էր ենթարկվել Ուֆայի «Բաշնեֆտ» գործարանը։
