Իրանը տարածաշրջանում կպահպանի իր հռչակած կարմիր գծերը․ Մեհդի Սոբհանի

Հայաստանում Իրանի դեսպան Մեհդի Սոբհանին հայտարարել է, որ Իրանը տարածաշրջանում կպահպանի իր հռչակած կարմիր գծերը և չի շեղվի դրանցից։ Այսօր հրավիրված մամուլի ասուլիսի ժամանակ նա նշել է՝ Իրանը չի ցանկանում, որ այս պատերազմը տարածվի այլ երկրներում կամ տարածաշրջաններում, եթե այն չպարտադրվի։

«Մենք խորհրդակցում ենք և կապ ունենք տարածաշրջանի երկրների հետ, մեր կարմիր գծերը հստակ են, ապացուցել ենք, որ երբեք չենք շեղվի դրանցից: Իհարկե, հավանականությունների աշխարհում ենք ապրում, բայց մենք փաստերի հետ ենք առնչվում: Մենք պահպանում ենք զգոնությունը, Հայաստանի Հանրապետության կառավարությունը ևս հետևում է զարգացումներին: Մենք անընդհատ Հայաստանի կառավարության հետ խորհրդակցություններ ենք անցկացնում», – ասաց Սոբհանին:

Սյունիքում ադրբեջանական հնարավոր ագրեսիայի մասին հարցին ի պատասխան՝ դեսպանն ասաց, որ հետևում են տարածաշրջանում տեղի ունեցող իրադարձություններին ու զարգացումներին:
Պատասխանելով ԱՄՆ նախագահ Դոնալդ Թրամփի՝ Թեհրանը տարհանելու հորդորին Մեհդի Սոբհանին հայտարարել է, թե ակնհայտ է այս պատերազմում ԱՄՆ աջակցությունն Իսրայելին։

«ԱՄՆ նախագահի սպառնալիքները խոսում են այն մասին, որ թշնամին պարտվելու շեմին է: Իրավիճակը դուրս է եկել վերահսկողությունից: Թրամփը սատկած ձի վարելու ընթացքում է», – ասել է Իրանի դեսպանը։
Մեհդի Սոբհանիի հրապարակած տվյալներով՝ Իսրայելի հարվածների հետևանքով երկրում զոհվել է 224, վիրավորվել՝ 1200 մարդ, նրանց 90 տոկոսը քաղաքացիական անձինք են:

Հիշեցնենք, որ Իսրայելը հունիսի 13-ի վաղ առավոտից հարվածներ էր հասցրել Իրանի տարածքին՝ թիրախավորելով Իրանի ռազմական և միջուկային օբյեկտները։ Ավելի ուշ Իրանը պատասխանել էր՝ Իսրայելի ուղղությամբ հրթիռային հարվածների ալիքներ հասցնելով։ Կողմերը շարունակում են փոխադարձ հարվածներ հասցնել։ Այսօր Իրան-Իսրայել հակամարտության հինգերորդ օրն է։

Անի Թամրազյան