«Պատիվ ունեմ»-ի հայտարարության նախագիծը չներառվեց ԱԺ օրակարգում․ ՏԵՍԱՆՅՈՒԹ

«Հայրենական պատերազմի 80-ամյակի առիթով» ԱԺ ընդդիմադիր «Պատիվ ունեմ» խմբակցության ներկայացրած հայտարարության նախագիծը չներառվեց ԱԺ օրակարգում։

Նախագծին կողմ քվեարկեց 27 պատգամավոր, ձեռնպահ՝ 2 պատգամավոր, դեմ՝ 54 պատգամավոր։

Ընդդիմադիր ուժի ներկայացրած հայտարարության նախագծում ասվում է․ «Ուղիղ 80 տարի առաջ քաղաքակիրթ մարդկությունը հավաքական ջանքերով և մեծ զոհողությունների գնով կարողացավ հաղթանակ տանել նացիստական Գերմանիայի և նրա դաշնակիցների նկատմամբ։

Երկրորդ համաշխարհային պատերազմը ոչ միայն իր ծավալներով էր աննախադեպ, այլ նաև իր բնույթով, այն քաղաքակրթական պայքար էր ընդդեմ այլատյացության։

Ֆաշիզմի դեմ հաղթանակում առանցքային էր Խորհրդային Միության դերը: Պատերազմում բեկումնային էին Ստալինգրադի և Կուրսկի ճակատամարտերը, իսկ Եվրոպայի ազատագրումը ֆաշիզմից անհնար էր առանց խորհրդային զինվորի սխրանքի:

Հայ ժողովուրդն աշխարհի տարբեր անկյուններում հսկայական ներդրում է ունեցել չարիքի առանցք հանդիսացող նացիզմի դեմ տարված հաղթանակում։ Ի դեպ, նույն խորհրդանշական օրը, Մեծ հաղթանակի ժառանգները, 1992-ի մայիսի 9-ին ազատագրեցին հայոց բերդաքաղաք Շուշին՝ հաղթանակ ապահովելով նեոֆաշիստական ռեժիմի դեմ։

Մենք համոզված ենք, որ քաղաքակիրթ մարդկությունն իր վճռական «ոչ»-ը պետք է ասի 21-րդ դարում ֆաշիզմի և նացիզմի ցանկացած դրսևորմանը»։

Նշենք, որ ԱԺ արտաքին հարաբերությունների մշտական հանձնաժողովում նախագիծը բացասական եզրակացություն էր ստացել։

Մանրամասները՝ տեսանյութում։