08.09.2026 | 13:18
Քոչարյանի հետ կապվող բրենդային խանութում 9,46 մլրդ դրամի թաքցված շրջանառություն է բացահայտվել․ ՊԵԿ․ ՏԵՍԱՆՅՈՒԹ
Սյունիքի մարզում աշխատող լրագրող Անուշ Միրզոյանին մեղադրանք է ներկայացվել
Հասարակություն
15.05.2025 | 21:35
Սյունիքի մարզում աշխատող լրագրող Անուշ Միրզոյանին մեղադրանք է ներկայացվել։
Քննչական կոմիտեի մամուլի խոսնակ Կիմա Ավդալյանը Factor TV-ի հետ զրույցում ասաց՝ Անուշ Միրզոյանի նկատմամբ քրեական հետապնդումը հարուցվել է զանգվածային անկարգություններ կազմակերպելուն օժանդակելու հոդվածով, դատարան է ներկայացվել միջնորդություն՝ նրա նկատմամբ վարչական հսկողությունը որպես խափանման միջոց կիրառելու վերաբերյալ։
Նշենք, որ գործն առնչվում է 2021 թվականին վարչապետ Նիկոլ Փաշինյանի՝ Սյունիք կատարած այցի ժամանակ այնտեղ սկսված բողոքի ակցիաներին։
Լրագրողը, մինչդեռ, Facebook-ի իր էջում հրապարակած տեսանյութում անդրադառնալով մեղադրանքին, պնդում է, որ այն առաջադրվել է մասնագիտական պարտականությունները կատարելու համար։
«Իմ նկատմամբ հարուցվել է հանրային քրեական հետապնդում՝ մասնագիտական պարտականություններս կատարելու կապակցությամբ։ Զավեշտալի, աբսուրդային իրավիճակ է, բայց մեր երկրում ստեղծված իրավիճակն այնպիսին է, որ ոչ մի բանի վրա զարմանալ չի կարելի»,- ասում է Անուշ Միրզոյանը։
Լրագրողը հայտնել էր նաև, որ իր նկատմամբ խափանման միջոց կիրառելու հարցով նիստ է հրավիրվել։
Դատարանը, սակայն, քիչ առաջ մերժել է լրագրողի նկատմամբ խափանման միջոց կիրառելու վերաբերյալ քննիչի միջնորդությունը:
Արաքս Մամուլյան
