29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Նախիջևանում զինվորականները բողոքում են, թե աշխատավարձերը կրճատվել են ԼՂ-ում «վերականգնման աշխատանքների պատճառով»
Քաղաքականություն
16.05.2025 | 23:30
Նախիջևանում զինվորականները բողոքում են, որ իրենց աշխատավարձերը կրճատվում են՝ Լեռնային Ղարաբաղի «վերականգնումը ֆինանսավորելու» համար, գրում է OC Media-ն։
«Նրանք ասում են, որ իրենց սպառնում են բողոքի ակցիաների ժամանակ։ Սպաներից Բ.Ն.-ն ասել է՝ «Ես չէի հավատում, որ վերցված գումարը նախատեսված էր [Լեռնային Ղարաբաղին] օգնելու համար»»,- գրել է լրատվամիջոցը:
«Մենք զինվորներ ենք, մեզանից շատերը կռվել են [Լեռնային Ղարաբաղում]: Մենք դեմ չենք ամսական 200-300 մանաթ (120-180 դոլար) ստանալուն: Մենք մեր կյանքը տվել ենք այս պետության համար և շարունակում ենք դա անել: Սակայն անընդունելի է, որ նրանք անընդհատ մեր աշխատավարձից պահումներ են անում: Մենք չենք հավատում նրանց ասածներին: Նրանք յուրացնում են այն գումարը, որը մեզանից պահվում է [Լեռնային Ղարաբաղը] կառուցելու անվան տակ»,- ասել է Բ.Ն.-ն:
Մեկ այլ սպա սոցիալական ցանցերում գրել է, որ խորհուրդ է տալիս կոռումպացված պաշտոնյաների փողերն օգտագործել Լեռնային Ղարաբաղի շինարարության մեջ։
«Մենք էլ մեր սեփական խնդիրներն ունենք։ Այս աշխատավարձը վաստակում ենք մեր քրտինքով։ Մենք օր ու գիշեր լեռներում ենք և տառապում ենք։ Սակայն Ադրբեջանում որոշ պաշտոնյաներ և գործարարներ բավականին հեշտությամբ են [փող] վաստակում։ Ավելի լավ կլիներ, եթե նրանց փողը գնար [Լեռնային Ղարաբաղի] շինարարությանը»,- ասել է նա։
OC Media-ն կապ է հաստատել Ադրբեջանի պաշտպանության նախարարության հետ, սակայն հրապարակման պահի դրությամբ պատասխան դեռ չի ստացել։
Թարգմանությունը Էմմա Չոբանյանի
