Թրամփը պահանջում է մշտական, այլ ոչ թե ժամանակավոր հրադադար Ուկրաինայում. Սպիտակ տուն

ԱՄՆ նախագահ Դոնալդ Թրամփը պահանջել է Ուկրաինայում մշտական ​​​​հրադադար, այն բանից հետո, երբ ՌԴ նախագահ Վլադիմիր Պուտինը մայիսին հայտարարել է մարտական ​​​​գործողությունների եռօրյա դադարի մասին, գրում է The Telegraph-ը։

Կրեմլը հայտարարել է՝ ակնկալում է, որ Ուկրաինան կպատասխանի մայիսի 8-10-ը հայտարարված հրադադարին և զգուշացրել՝ կարձագանքի ցանկացած «խախտման»։ Ուկրաինան, սակայն, հայտարարել է, որ Ռուսաստանը պետք է անհապաղ հայտարարեր 30-օրյա հրադադարի մասին, եթե «իսկապես խաղաղություն է ուզում»։

Սպիտակ տունը հայտարարել է, որ Թրամփը, որն այս շաբաթ խաղաղության համաձայնագրի կնքմանն է ձգտում, ցանկանում է տեսնել «մշտական ​​հրադադար»։ Վաշինգտոնը նաև զգուշացրել է, որ ԱՄՆ նախագահն «ավելի ու ավելի է հիասթափվում» թե՛ Վլադիմիր Պուտինից, թե՛ Վլադիմիր Զելենսկիից։

Սպիտակ տան մամուլի քարտուղար Քերոլայն Լևիթին հարցրել են շաբաթավերջին Թրամփի և Զելենսկիի հանդիպման մասին։

«Նա ավելի ու ավելի է հիասթափվում երկու երկրների առաջնորդներից։ Նա ցանկանում է տեսնել մշտական ​​հրադադար։ Ես հասկանում եմ, որ Վլադիմիր Պուտինն այսօր առավոտյան առաջարկել է ժամանակավոր հրադադար։ Նախագահը հստակեցրել է, որ ցանկանում է տեսնել մշտական ​​​​հրադադար, նախ՝ սպանությունները դադարեցնելու, արյունահեղությունը դադարեցնելու համար։ Եվ չնայած նա լավատես է, որ կարող է համաձայնության գալ, նա նաև իրատես է, և երկու առաջնորդներն էլ պետք է նստեն բանակցությունների սեղանի շուրջ՝ այս իրավիճակից դուրս գալու ճանապարհ գտնելու համար բանակցելու նպատակով»,- ասել է Լևիթը։

Հիշեցնենք, որ Կրեմլն այսօր ավելի վաղ հայտարարել էր, որ Վլադիմիր Պուտինի որոշմամբ, մարդասիրական նկատառումներից ելնելով՝ Հաղթանակի 80-ամյակի օրերին՝ մայիսի 7-8-ի կեսգիշերից մինչև մայիսի 10-11-ի կեսգիշերը, ռուսական կողմը հրադադար է հայտարարում։

Թարգմանությունը՝ Էմմա Չոբանյանի