Ուկրաինական ԱԹՍ-ները հարվածել են Ռյազանում «Յանդեքս»-ի տվյալների կենտրոնին և Բաշկորտոստանում նավթավերամշակման գործարանին

Ուկրաինական Exilenova+-ն և Supernova+ մոնիթորինգային տելեգրամ ալիքները հայտնում են Ռյազանի մարզում գտնվող «Յանդեքս»-ի տվյալների կենտրոնի և Բաշկորտոստանում «Գազպրոմ նեֆտեխիմ Սալավատ» նավթավերամշակման գործարանի վրա հարձակման մասին, գրում է Current time-ը։

Astra-ն պարզել է, որ հրդեհ է բռնկվել «Սաստա» հաստոցաշինական գործարանի տարածքում, որտեղ գտնվում է նաև «Յանդեքս»-ի տվյալների կենտրոնը։ «Յանդեքս»-ը հայտարարել է Yandex Cloud ամպային հարթակի առանձին հասանելիության գոտու էլեկտրամատակարարման «խափանումների» մասին և նշել, որ աշխատանքներ են իրականացվում «միջադեպի» հետևանքները վերացնելու ուղղությամբ։

Ավելի ուշ ընկերությունը հաստատել է, որ Սասովոյում գտնվող տվյալների կենտրոնում տեղի է ունեցել «միջադեպ, որն ազդել է ենթակառուցվածքի մի մասի վրա»։

«Ներկայում իրավիճակը տարածքում վերահսկողության տակ է, տուժածներ չկան։ Թիմն աշխատում է միջադեպի հետևանքները վերացնելու և վնասված ծառայությունների աշխատանքը վերականգնելու ուղղությամբ»,- ՌԲԿ-ին հայտնել են ընկերությունից։

Հարձակումից հետո «Յանդեքս»-ի որոշ ծառայությունների աշխատանքում խափանում է առաջացել։ «Դոժդ» հեռուստաալիքը նկատել է, որ անհասանելի են դարձել նաև ռուսական ինտերնետային տարածքի (Ռունետ) մի շարք այլ կայքեր, այդ թվում՝ ավտոմատ հրապարակումների համար նախատեսված Postmypost հարթակը և «Կոմսոմոլսկայա պրավդա»-ի տարածաշրջանային տարբերակը։

Astra-ն, ուսումնասիրելով Բաշկորտոստանում տեղի ունեցած հրդեհի կադրերը, նույնպես հանգել է եզրակացության, որ, ամենայն հավանականությամբ, հրդեհը տեղի է ունեցել «Գազպրոմ նեֆտեխիմ Սալավատ» նավթավերամշակման գործարանի տարածքում, որը Ռուսաստանի խոշորագույն նավթավերամշակման և նավթաքիմիական համալիրներից մեկն է։

Ձեռնարկությունը, որը նախկինում բազմիցս ենթարկվել է ուկրաինական հարձակումների և դրանցից հետո դադարեցրել է աշխատանքը, գտնվում է Ուկրաինայի հետ սահմանից շուրջ 1 400 կիլոմետր հեռավորության վրա։

Exilenova+-ը, հղում անելով տեղի բնակիչներին, հայտնում է Ստերլիտամակում պայթյունների մասին։

Ռուսաստանի ՊՆ-ն հայտարարել է, որ Բելգորոդի, Բրյանսկի, Վոլգոգրադի, Վորոնեժի, Կուրսկի, Լիպեցկի, Օրյոլի, Օրենբուրգի, Պենզայի, Ռոստովի, Ռյազանի, Սամարայի, Սարատովի, Սմոլենսկի, Տամբովի, Տուլայի և Ուլյանովսկի մարզերի, Մոսկվայի տարածաշրջանի, Բաշկորտոստանի, բռնակցված Ղրիմի, Թաթարստանի տարածքների, ինչպես նաև Սև ծովի  վրա խոցվել է 399 ուկրաինական անօդաչու թռչող սարք։

Թարգմանությունը՝ Էմմա Չոբանյանի