Բրիտանիան իր քաղաքացիներին կոչ է անում չայցելել Ադրբեջանի՝ ՀՀ-ի հետ սահմանակից շրջաններ

Մեծ Բրիտանիայի արտաքին գործերի նախարարությունն (FCDO) իր քաղաքացիներին խորհուրդ է տալիս զերծ մնալ Ադրբեջանի հարավ-արևմտյան՝ Հայաստանին սահմանակից շրջաններ այցելելուց։ Նշենք, որ Ադրբեջան այցելելու մասին գերատեսչությունը վերջին թարմացումն արել է 2025 թվականի ապրիլի 4-ին։

«Հայաստանի հետ սահմանը շարունակում է փակ մնալ։ FCDO-ն խորհուրդ է տալիս զերծ մնալ Հայաստանի հետ սահմանից 5 կմ հեռավորության վրա բոլոր ճանապարհորդություններից՝ Ադրբեջանի և Հայաստանի միջև լարվածության պատճառով: Նշենք, որ սա չի ներառում Ադրբեջանի Նախիջևանի սահմանը Հայաստանի հետ»,- ասվում է հաղորդագրության մեջ։

Նշվում է, որ հարավարևմտյան շրջանները 2020 և 2023 թվականներին հակամարտությունից տուժած տարածքներն են։ Բրիտանական գերատեսչությունը խորհուրդ է տալիս խուսափել բոլորից, բացառությամբ՝ էական ճանապարհորդությունների, դեպի «Քելբաջարի, Լաչինի, Կուբաթլիի, Զանգելանի, Ջեբրայիլի, Ֆիզուլիի, Խոջավենդի, Շուշայի, Խոջալուի, Խանքենդիի, Աղդամի և Տերտերի շրջանները»։ Գերատեսչությունն օգտագործում է Արցախի բնակավայրերի ադրբեջանական անվանումները։ Այն նաև խորհուրդ է տալիս այցելուներին հետևել Ադրբեջանի ազգային կառավարության և տեղական իշխանությունների խորհուրդներին այն տարածքներում, որոնք չեն մաքրվել ականներից կամ չպայթած զինամթերքից։

Հավելենք, որ Հայաստանի հետ կապված վերջին թարմացումը վերաբերում է 2025 թվականի հունվարի 17-ին և խորհուրդ է տրվում զերծ մնալ Հայաստանի և Ադրբեջանի միջև արևելյան սահմանից 5 կմ հեռավորության վրա բոլոր ճանապարհորդություններից՝ երկու երկրների միջև լարվածության պատճառով։

FCDO-ն խորհուրդ է տալիս չայցելել Իջևան-Նոյեմբերյան քաղաքների միջև M16/H26 ճանապարհի երկայնքով՝ սահմանային լարվածության պատճառով։

Թարգմանությունը՝ Էմմա Չոբանյանի