09.08.2026 | 16:37
Վթարային ջրանջատում Կտայքում և Երևանում
Ալի Խամենեին կարգադրել է Իրանի զինված ուժերը բարձր պատրաստվածության բերել ու զգուշացում է ուղարկել ԱՄՆ ռազմաբազաներ ունեցող 6 երկրի
Քաղաքականություն
06.04.2025 | 18:10
Թեև Իրանը մերժել է ԱՄՆ նախագահ Դոնալդ Թրամփի ուղիղ բանակցություններ սկսելու պահանջը, սակայն ցանկանում է շարունակել անուղղակի բանակցությունները Օմանի միջոցով․ ասել է պաշտոնյան, որը անանունության պայմանով խոսել է Reuters-ի հետ:
«Անուղղակի բանակցությունները հնարավորություն են տալիս գնահատել Վաշինգտոնի լրջությունը Իրանի հետ քաղաքական հարցերի լուծման հարցում»,- ասել է պաշտոնյան։
Իրանը ծանուցումներ է ուղարկել ամերիկյան ռազմաբազաներ ունեցող՝ Իրաքին, Քուվեյթին, Արաբական Միացյալ Էմիրություններին, Քաթարին, Թուրքիային և Բահրեյնին, որ ԱՄՆ-ի կողմից Իրանի վրա հարձակման ցանկացած աջակցություն՝ ներառյալ իրենց օդային տարածքը կամ տարածքը ԱՄՆ բանակի հարձակման դեպքում ԱՄՆ-ին տրամադրելուն, կդիտվի որպես թշնամական գործողություն:
«Նման արարքը նրանց համար ծանր հետևանքներ կունենա», – ասել է պաշտոնյան՝ հավելելով, որ գերագույն առաջնորդ այաթոլլա Ալի Խամենեին Իրանի զինված ուժերը բարձր պատրաստվածության բերելու կարգադրություն է արել:
Իրաքի, Քուվեյթի, ԱՄԷ-ի, Քաթարի և Բահրեյնի կառավարությունների խոսնակներն անմիջապես չեն արձագանքել մեկնաբանությունների խնդրանքներին: Թուրքիայի արտաքին գործերի նախարարությունը հայտարարել է, որ տեղյակ չէ նախազգուշացման մասին, սակայն նման հաղորդագրությունները կարող են փոխանցվել այլ ալիքներով:
Թարգմանությունը՝ Անահիտ Խաչատրյանի
