Վրաստանի խորհրդարանն ընդունել է «օտարերկրյա գործակալների» գրանցման և հեռուստաընկերությունների օտարերկրյա ֆինանսավորման արգելքի մասին օրենքները

Վրաստանի խորհրդարանը երրորդ ընթերցմամբ և ամբողջությամբ ընդունել է «օտարերկրյա գործակալների» գրանցման և հեռուստառադիոընկերությունների օտարերկրյա ֆինանսավորման արգելքի մասին օրենքները, գրում է Current time-ը։

Իշխող «Վրացական երազանք» կուսակցությունը, որը նախաձեռնել է «օտարերկրյա գործակալների» գրանցման մասին օրինագիծը, պնդում է, որ փաստաթուղթը, իբր, ամերիկյան FARA օրենքի (Օտարերկրյա գործակալների գրանցման ակտ) պատճենն է։ Սակայն, ի տարբերություն ամերիկյան օրենքի, վրացական օրենքն ուղղված է անկախ քաղաքացիական հասարակության կազմակերպություններին և լրատվամիջոցներին։

Նոր օրենքի համաձայն՝ «օտարերկրյա գործակալի» կարգավիճակ կստանան ոչ միայն շահույթ չհետապնդող կազմակերպությունները, այլև ֆիզիկական անձինք։ Օրենքի դրույթները չկատարելը քրեական պատասխանատվություն է առաջացնում։

«Անցյալ տարի մենք ընդունեցինք պարզեցված տարբերակը, բայց գիտեք, որ մի քանի տասնյակ ամենահարուստ և խոշորագույն ՀԿ-ներ գրանցված չեն եղել ռեգիստրում։ Դրա համար մենք կստանանք նոր ամերիկյան օրենք՝ դրա գործող տարբերակի ուղղակի պատճենը, և մենք երաշխավորում ենք դրա ամբողջական կատարումը»,- հայտարարել է «Վրացական երազանք» կուսակցության գործադիր քարտուղար Մամուկա Մդինարաձեն։

Բացի «Օտարերկրյա գործակալների գրանցման մասին» օրենքից՝ Վրաստանի խորհրդարանը Քրեական օրենսգիրք է վերադարձրել պետական դավաճանության մասին հոդվածը, ընդունել է փոփոխություններ, որոնք արգելում են հեռուստատեսությունների և ռադիոընկերությունների օտարերկրյա ֆինանսավորումը, նաև օրենսդրությունից բացառում են «գենդեր» և «գենդերային ինքնություն» տերմինները։

«Հեռարձակման մասին» օրենքում կատարված փոփոխությունները նաև արգելում են արտաքին դոնորներին և հովանավորներին, որոնք փաստաթղթում նշված են որպես «օտար ուժեր», մասնակցել կոնկրետ ծրագրերի կամ նախագծերի համաֆինանսավորմանը։ Բացի այդ, հեռարձակողներին կարգելվի նաև ուղղակի կամ անուղղակի ֆինանսավորում ստանալ սոցիալական գովազդ հեռարձակելու դիմաց։

Թարգմանությունը՝ Էմմա Չոբանյանի