Աջակցում ենք՝ գնում են սովորելու, հետ չեն գալիս․ սա ինչի՞ մասին ա վկայում․ Նիկոլ Փաշինյան․ ՏԵՍԱՆՅՈՒԹ

Կառավարության այսօրվա նիստում ԿԳՄՍ նախարար Ժաննա Անդրեասյանը ներկայացրեց նախագիծ, որով կվերանայվի ուսանողների՝ արտերկրի բուհերում սովորելու կրթաթոշակային քաղաքականությունը։

«Նախատեսվում է կիրառել ձեռնարկությունների նորարարական ներուժի հզորացման գործընթացում պետական աջակցության նոր մոտեցում և հնարավորություն ընձեռել ՀՀ ռեզիդենտ հանդիսացող առևտրային կազմակերպությունների աշխատակիցների համար, որոնք ուսանող կլինեն օտարերկրյա հեղինակավոր բուհերում։ Մենք նկատի ունենք Շանհայի ռեյտինգավորման համակարգում առաջին 65 բուհերը բակալավրիատի դեպքում, առաջին 75 բուհերը՝ մագիստրատուրայի դեպքում։ Այս պարագայում կհամաֆինանսավորենք ուսման վարձը»,- ասաց նախարարը:

Ծրագրի հիմնական պայմանն է, որ համաֆինանսավորմանը պետք է մասնակցի նաև մասնավորը, այսինքն՝ առևտրային կազմակերպությունը, որը պետք է ունենա առնվազն 100 աշխատող, համաֆինանսավորի կրթարթոշակն առնվազն 50 տոկոսով, որից հետո նախատեսվում է, որ պետությունն ամեն տարի առավելագույնը 10 մլն դրամի չափով կրթաթոշակ կտրամադրի:
Վարչապետ Նիկոլ Փաշինյանն արձագանքեց, որ այս թեման Կառավարությանը վաղուց է մտահոգում, քանի որ պետությունը չունի ծրագիր, որն ուսանողներին առաջնակարգ բուհերում ուսանելու և Հայաստանում գործելու հնարավորություն տա: Այժմ այդ մեխանիզմների փնտրտուքի մեջ են։

««Լույս» հիմնադրամի կրթաթոշակ ստացածների ընդամենը 20 տոկոսն է, որ վերադարձել է Հայաստան, և, հետևաբար, ստացվում է, որ կրթության ֆինանսավորման ներքո մենք արտագաղթ ենք ֆինանսավորում»,- ասաց Փաշինյանը՝ նշելով, որ համանման գործունեություն պատվիրակել են նաև «Իմ քայլը» հիմնադրամին, բայց կրկին 40 տոկոս չվերադարձելիություն է եղել, և դա խնդիր է:

«Թվում է, թե Կառավարությունը կա՛մ ուղիղ, կա՛մ անուղղակի աջակցում է, որ մարդիկ գնան, սովորեն, բայց գնում են, հետ չեն գալիս»,- ասաց Փաշինյանը։

Որոշման նախագիծը թեև ընդունվեց, սակայն Կառավարության անդամների քննարկման արդյունքում որոշվեց, որ պետք է մինչև աշուն մոնիթորինգ արվի՝ հասկանալու սովորածների վերադարձելիության մասով վիճակագրությունը: Եթե պարզվի, որ կրթություն ստանալուց հետո ՀՀ վերադարձողների և ՀՀ-ում աշխատողների թիվը ցածր է, ապա ծրագիրը չպետք է գործի:

Մանրամասները՝ տեսանյութում։