Ադրբեջանցի զինծառայողի կրակոցից վիրավորված կնոջ անչափահաս երեխաները բուժօգնության են դիմել. Դատախազություն

Ադրբեջանցի զինծառայողի կողմից վիրավորում ստացած սյունեցի կնոջ 12 և 15 տարեկան երեխաները նույնպես մարմնական վնասվածքներով բուժօգնության են դիմել: Այս մասին Factor.am-ին հայտնեցին Գլխավոր դատախազությունից:

Ըստ կառույցի՝ 12-ամյա երեխայի մոտ արձանագրվել է փափուկ հյուսվածքների սալջարդ, իսկ 15-ամյա երեխայի մոտ՝ աջ դաստակի կոտրվածք։

Դատախազությունից հայտնում են, որ Քրեական վարույթը նախաձեռնվել է 3 հոդվածներով. զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ առողջությանը ծանր վնաս պատճառելու, ապօրինի կերպով հրազեն ձեռք բերելու, իրացնելու, պահելու, փոխադրելու, կրելու, և մարդու կամքին հակառակ կամ կամքն անտեսելով նրա բնակարան ապօրինի մուտք գործելու հատկանիշներով:

Դեպքի վայրի զննությամբ վերցվել են փորձանմուշներ, նշանակվել է դատաբժշկական փորձաքննություն։

Դատախազությունը միջադեպից նաև այլ մանրամասներ է հայտնել:

«Հոկտեմբերի 1-ին՝ ժամը 14:00-ի սահմաններում, Ադրբեջանի Հանրապետության քաղաքացի, զինծառայող Նասիմի Մուսաևը ապօրինի մուտք է գործել Սյունիքի մարզի Սիսիան համայնքի Շաքի բնակավայրի 6-րդ փողոցի 20-րդ տուն: Հայտնաբերվելուց հետո զենքից արձակել է կրակոցներ: Կրակոցի հետևանքով վիրավորում է ստացել 1987 թվականին ծնված Ա.Ա.-ն: Այնուհետև, Ադրբեջանի Հանրապետության քաղաքացին դիմել է փախուստի: Ձեռնարկված միջոցառումների արդյունքում Նասիմի Մուսաևը հայտնաբերվել է Շաքի բնակավայրի 6-րդ փողոցի 26-րդ հասցեում»,- մանրամասնում են Դատախազությունից:

Ադրբեջանցին հայտնաբերվել է միջադեպից ավելի քան մեկ ժամ անց. ժամը 15:30-ին նա ձերբակալվել և ներկայացվել է նախաքննական մարմին։

Արփի Հակոբյան