Թրամփը հայտարարել է, որ ԱՄՆ-ը մտադիր է «գնել և տիրապետել» Գազայի հատվածը

Դոնալդ Թրամփը հայտարարել է, որ ԱՄՆ-ը մտադիր է «գնել և տիրապետել Գազայի հատվածին», և որ ինքը կարող է թույլ տալ Մերձավոր Արևելքի այլ երկրներին օգնել դրա զարգացմանը, գրում է The Washington Post-ը։

«Մտածեք դրա մասին որպես անշարժ գույքի մեծ կտորի, որը Միացյալ Նահանգները կունենա և դանդաղ, շատ դանդաղ կզարգացնի։ Մենք կարող ենք այն հանձնել Մերձավոր Արևելքի այլ պետություններին՝ դրա առանձին հատվածները կառուցելու համար: Այլոք կարող են դա անել մեր պաշտպանության ներքո»,- ասել է Թրամփը։

Անցյալ շաբաթ Թրամփի հայտարարությունը, որ ԱՄՆ-ը կարող է «վերցնել» Գազայի հատվածը և տեղահանել պաղեստինցիներին, զայրույթ էր առաջացրել հարևան երկրներում, այդ թվում՝ Հորդանանումը, որտեղ արդեն միլիոնավոր պաղեստինցի փախստականներ են ապրում: Հորդանանի առաջնորդ Աբդալլահ Երկրորդ թագավորը վաղը Վաշինգտոնում հանդիպելու է Թրամփին։

ԱՄՆ նախագահի ծրագրին ահազանգով են արձագանքել նաև ՄԱԿ-ն ու այլ երկրներ, որոնք հայտարարել են, որ դա կխախտի միջազգային իրավունքը։

«Մարդկանց ցանկացած բռնի տեղահանում հավասարազոր է էթնիկ զտումների»,- ասել է ՄԱԿ-ի խոսնակ Ստեֆան Դյուժարիկը։

Թրամփը կիրակի լրագրողներին ասել է, որ Միացյալ Նահանգները Գազայի հատվածը «շատ լավ վայր կդարձնի ինչ-որ մեկի կողմից ապագա զարգացման համար», և որ մարդիկ կարող են գալ աշխարհի բոլոր ծայրերից ու ապրել այնտեղ։ Նա նաև ասել է, որ կքննարկի առանձին պաղեստինցիների՝ Միացյալ Նահանգներում բնակություն հաստատելու հնարավորությունը:

«Տարօրինակ է լինել մի ժամանակաշրջանում, երբ պետական կառավարումը փոխարինվել է անշարժ գույքի գործակալի արհեստով»,- ասել է ՄԱԿ-ի մարդասիրական հարցերով ղեկավար Թոմ Ֆլետչերը։

Նա հավելել է, որ պաղեստինցիները պետք է մասնակցեն անկլավի ապագայի վերաբերյալ ցանկացած քննարկման։

«Ես շատ մարդկանց հարցրեցի, թե ինչ են մտածում, և նրանցից յուրաքանչյուրն ասաց՝ «Մենք ոչ մի տեղ չենք գնալու: Մենք նորից, նորից ու նորից կվերակառուցենք մեր տները, ինչպես միշտ արել ենք»»,- ընդգծել է Ֆլետչերը։

Թարգմանությունը՝ Էմմա Չոբանյանի