Կասպից ծովի ծանծաղումը կհանգեցնի աղետալի հետևանքների, մակերեսը կրճատվել է ավելի քան 20 հազար քառակուսի կմ-ով․ Ալիև

Կասպից ծովի ծանծաղումը շարունակում է մնալ ամենասուր բնապահպանական խնդիրներից մեկը, որը, ներկայիս տեմպերի պահպանման դեպքում, սպառնում է աղետալի հետևանքներով։ Այս մասին հայտարարել է Ադրբեջանի նախագահ Իլհամ Ալիևը Թուրքմենբաշիում կայացած Կասպյան բնապահպանական գագաթնաժողովում, գրում են ադրբեջանական լրատվամիջոցները։

Նա նշել է, որ ջրի մակարդակի անկման գործընթացն արագացել է, իրավիճակը շարունակում է վատթարանալ։ Նա ընդգծել է ծովի ջրային տարածքի զգալի կրճատումը՝ հստակեցնելով, որ ծովի ընդհանուր մակերեսը նվազել է ավելի քան 20 հազար քառակուսի կիլոմետրով։

«Եթե ներկայիս միտումը շարունակվի, հետևանքները կարող են աղետալի բնույթ ունենալ։ Ծովի ծանծաղման խնդիրը միայն բնապահպանական բնույթ չի կրում։ Ծովի մակարդակի նվազումն անմիջականորեն առնչվում է մեր պետությունների շահերին, ազդում է ափամերձ շրջանների բնակիչների կյանքի, տնտեսության և տրանսպորտի վրա։ Մենք տեսնում ենք, թե ինչպես է նահանջում ափագիծը, փոխվում է էկոհամակարգը, և խնդիրներ են առաջանում նավահանգիստների ու ափամերձ ենթակառուցվածքի այլ օբյեկտների աշխատանքում։ Կասպից ծովի մակարդակի նվազման հետևանքով միայն Կասպից ծովի ադրբեջանական հատվածում առաջացել է շուրջ 30 հազար հեկտար ցամաքային տարածք»,- ասել է Ալիևը։

Նա ընդգծել է քննարկումներից իրական համագործակցության անցնելու անհրաժեշտությունը և կոչ արել ստեղծել մշտապես գործող մեխանիզմ՝ ծովի մակարդակի հետագա նվազումը կանխելուն ուղղված որոշումների կատարման վերահսկողության համար։ Ալիևը հիշեցրել է, որ դեռևս 2022 թվականին Աշխաբադում առաջարկել էր ձևավորել փորձագիտական խմբեր՝ Կասպից ծովի ծանծաղման պատճառներն ուսումնասիրելու համար։ Նրա խոսքով՝ անցած տարիները միայն հաստատել են այդ գաղափարի արդիականությունը։

Ըստ Ադրբեջանի նախագահի՝ ներկայում առանցքային խնդիրն է ծովի մակարդակի անկման վրա ազդող գործոնների համակողմանի վերլուծությունը և օբյեկտիվ գիտական կանխատեսման կազմումը։