30.04.2026 | 20:48
Մեր ազգն այժմ պետք է կենտրոնանա ներկայի և ապագայի վրա, այլ ոչ թե մնա անցյալում. Արարատ Միրզոյանի հարցազրույցը France 24-ին
Թուրքիայի ցամաքային զորքերի հրամանատարը Բաքվում է
Քաղաքականություն
23.12.2024 | 19:40
Թուրքիայի ՊՆ բարձրաստիճան զինվորականների այցերը Բաքու շարունակվում են։ Ադրբեջանի պաշտպանության նախարար Զաքիր Հասանովն այսօր ընդունել է Թուրքիայի ցամաքային զորքերի հրամանատար, բանակի գեներալ Սելջուկ Բայրաքթարօղլուի գլխավորած պատվիրակությանը։
Ադրբեջանական կողմի փոխանցմամբ՝ Հասանովը հանդիպմանն ընդգծել է երկկողմ ռազմական համագործակցության բարձր մակարդակը, ինչպես նաև համագործակցությունը բոլոր ոլորտներում։ Նշվել է «երկու եղբայրական պետությունների ղեկավարների բարեկամական հարաբերություններն արտացոլող Շուշիի հռչակագրի կատարման հետ կապված համապատասխան միջոցառումների իրականացման կարևորությունը»։ Հասանովն ընդգծել է Ադրբեջանի և Թուրքիայի միջև ռազմավարական գործընկերության դերը տարածաշրջանում խաղաղության և կայունության ապահովման գործում։
Բայրաքթարօղլուն իր հերթին նշել է, որ պարբերական փոխայցելությունների կազմակերպումն ու հանդիպումների անցկացումն «Ադրբեջանի և Թուրքիայի միջև անխզելի բարեկամական և եղբայրական հարաբերությունների դրսևորում է»։ Ընդգծվել է, որ ադրբեջանա-թուրքական բարձր մակարդակի ռազմական երկխոսության հանդիպումը մեծ նշանակություն ունի երկու երկրների բանակների միջև փոխկապակցվածության ապահովման գործում։
Թուրքական պատվիրակությանն ընդունել է նաև Ադրբեջանի ԶՈՒ ԳՇ պետ Քերիմ Վելիևը։
Հանդիպմանն ընդգծվել է համատեղ վարժանքների անցկացման կարևորությունը երկու երկրների զինվորականների պրոֆեսիոնալիզմի բարձրացման և փորձի փոխանակման գործում։
Թուրքական պատվիրակությունը հանդիպել է նաև Ադրբեջան Պետական սահմանային ծառայության (ՊՍԾ) պետ, գեներալ-գնդապետ Էլչին Գուլիևի հետ։
Հավելենք, որ օրերս էլ այցով Բաքվում էր Թուրքիայի զինված ուժերի ցամաքային զորքերի հրամանատարության պատվիրակությանը՝ գեներալ-լեյտենանտ Թունջայ Ալթուղի գլխավորությամբ։
Թարգմանությունը՝ Էմմա Չոբանյանի
