27.05.2026 | 11:55
15 հազար դրամով մարդկանց ներգրավել են «Ուժեղ Հայաստան»-ի հանրահավաքին․ 2 անձ կալանավորվել է
ՀՀ ԱԱԾ-ն ընդդիմադիր քաղաքական ուժերի ներկայացուցիչներին հորդորում է հանրահավաքի ժամանակ զերծ մնալ սադրիչ գործողություններից
02.10.2024 | 14:25
Հայաստանի Հանրապետության ազգային անվտանգության ծառայությունը հայտարարություն է տարածել՝ ընդդիմադիր քաղաքական ուժերի ներկայացուցիչներին հորդորելով հոկտեմբերի 2-ին Հանրապետության հրապարակում նախատեսված հանրահավաքի ժամանակ զերծ մնալ սադրիչ գործողություններից:
«Ելնելով ՀՀ սահմանադրական կարգը պահպանելու, անձի կամ կազմակերպության իրավունքները, ազատությունները կամ օրինական շահերը կամ հասարակության կամ պետության օրինական շահերը պաշտպանելու առաքելությունից, հորդորում ենք ընդդիմադիր քաղաքական ուժերի ներկայացուցիչներին 2024 թվականի հոկտեմբերի 2-ին Երևան քաղաքի Հանրապետության հրապարակում նախատեսվող հանրահավաքի ընթացքում զերծ մնալ իշխանությունը զավթելու, սահմանադրական կարգը բռնի տապալելու, անձի կամ անձանց խմբի նկատմամբ որևէ հանգամանքով պայմանավորված բռնություն գործադրելու, իշխանության ներկայացուցչին դիմադրություն ցույց տալու հրապարակային կոչեր հնչեցնելուց կամ դրանց կատարմանն ուղղված գործողություններ ձեռնարկելուց: Նախազգուշացնում ենք, որ տիրապետում ենք օպերատիվ իրավիճակին, և մեզ վերապահված ողջ գործիքակազմի կիրառմամբ ի զորու ենք չեզոքացնել ՀՀ ներքին անվտանգության խաթարմանն ուղղված գործողությունները:
Միաժամանակ, վերահաստատելով, որ ՀՀ սահմանադրական կարգին ու պետության անվտանգությանը սպառնացող ցանկացած գործողություն հանգեցնելու է համապատասխան քրեաիրավական հետևանքների, հավաքի մասնակից քաղաքացիներին հորդորում ենք դրսևորել իրավահպատակ վարքագիծ և չտրվել սադրիչ գործողությունների»,- նշված է ԱԱԾ-ի տարածած հայտարարության մեջ:
Հիշեցնենք, որ Բագրատ արքեպիկոպոս Գալստանյանը հոկտեմբերի 2-ին ժամը 18:30-ից Հանրապետության հրապարակում հանրահավաք է հրավիրել:
