Երիտասարդների «որս»․ ֆիլմ-ահազանգ Հայաստանում թմրամոլության ահագնացող ծավալների մասին. ՏԵՍԱՆՅՈՒԹ

Օրերս տեղի ունեցավ Factor TV-ի «Թակարդ N 420» ֆիլմի պրեմիերան։ Այն պատմում է Հայաստանում թմրանյութի ճիրաններում հայտնված երիտասարդների, թմրամիջոցների տարածման դեմ պայքարի և այդ ճանապարհին հանդիպող խոչընդոտների մասին։

«Չորս քսան» արտահայտությունն էլ պատահական չի ընտրվել. այն բնորոշում է մարիխուանա ծխելու գործընթացը։ Ֆիլմը նկարահանվել է «Հայաստանի մեդիայի զարգացման ծրագրի» շրջանակում, որը ֆինանսավորվում է ԱՄՆ Միջազգային զարգացման գործակալության կողմից։

«Այս ֆիլմը փորձ է՝ ահազանգելու, կրթելու, իրազեկելու և, ինչու ոչ, նաև պահանջելու գերատեսչություններից, պատկան մարմիններից ավելի գործուն քայլեր գործադրելու, որպեսզի կանխարգելվի թմրանյութերի տարածվածությունը երիտասարդների և դեռահասների շրջանում»,-ասում է ՖԱԿՏՈՐ տեղեկատվական կենտրոն ՀԿ նախագահ Արևիկ Սահակյանը։

Թմրամիջոցների ապօրինի շրջանառությունը և թմրանյութ գործածողների թիվը Հայաստանում օրեցօր մեծանում է։ Մինչ օրս Հայաստանը չունի թմրամոլության, թմրամիջոցների և հոգեմետ նյութերի ապօրինի շրջանառության դեմ պայքարի ազգային ռազմավարություն։ 2023-ին վարչապետի հանձնարարությամբ սկսել է մշակվել թմրամիջոցների դեմ պայքարի ազգային ծրագիրը։

«Երբ փորձում էի տվյալներ հավաքագրել, ինձ համար անակնկալ էր, որ վերջին վիճակագրական տվյալը 22 տարի առաջվա վաղեմություն ուներ։ Այսինքն՝ վարչապետը Ազգային ժողովում հայտարարում է, որ սա ազգային անվտանգության սպառնալիք է, բոլոր գերատեսչությունների ղեկավարները ֆիքսում են, որ սա, իրոք, սպառնալիք է ազգային անվտանգությանը, մինչդեռ վերլուծություն կամ քայլեր, ռազմավարություն անգամ մինչև այս պահը չունենք»,- շեշտում է «Թակարդ N 420» ֆիլմի հեղինակ Լիլիթ Ավագյանը։

Թմրանյութերի հետ կապված հանցագործությունների թիվը Հայաստանում 2022 թվականին 2266 է եղել, 2023-ին արդեն՝ 5070։ Ինչ վերաբերում է քրեական պատասխանատվության ենթարկված անձանց, 2022-ին այդ թիվը կազմել է 754, 2023-ին՝ 1244։

Մանրամասները՝ տեսանյութում։

Աննա Բաբաջանյան