Ժորժե Ժեզուշը՝ Ռոնալդուի հետ կոնֆլիկտի մասին. «Կանոնները բոլորի համար նույնն են»

Պորտուգալիայի հավաքականի գլխավոր մարզիչ Ժորժե Ժեզուշը ֆուտբոլի Ազգերի լիգայի երրորդ տուրում դանիացիների նկատմամբ 4:2 հաշվով հաղթանակից հետո անդրադարձել է Սաուդյան Արաբիայի չեմպիոն «Ալ Նասրի» հարձակվող Կրիշտիանու Ռոնալդուի շուրջ ստեղծված իրավիճակին: Պորտուգալիայի հավաքականի ավագն ազգային թիմի ճամբարը լքել էր այն բանից հետո, երբ իմացել էր, որ չի լինելու մեկնարկային կազմում: Ռոնալդուն նաև հանդես էր եկել հայտարարությամբ՝ նշելով, որ հետագայում կպատմի հեռանալու պատճառների մասին ճշմարտությունը:

Ժորժե Ժեզուշին հարցրել են՝ արդյոք տեղի ունեցածը ստիպել է իրեն վերանայել ինչ-որ բան:

«Բացարձակապես ոչ: Կան բարձր կարգավիճակ ունեցող խաղացողներ, բայց կանոնները բոլորի համար նույնն են։ Ես միշտ այդպես եմ մտածել իմ ամբողջ կարիերայի ընթացքում և կշարունակեմ հավատալ դրան:

Թիմը միասին հավատում է իր գործին։ Ինձ համար սա մեր լավագույն խաղն էր մինչև օրս, ինչը լավ է, քանի որ մենք ավելի շատ ժամանակ ունեինք աշխատելու»,- 72-ամյա մարզչի խոսքը մեջբերում է Record-ը:

Ժորժե Ժեզուշն ամռանն է գլխավորել Պորտուգալիայի հավաքականը, որը նրա գլխավորությամբ անցկացրել է երեք հանդիպում ու տարել նույնքան հաղթանակ:

Ավելի վաղ լուրեր էին շրջանառվում, որ Ռոնալդուն որոշել է ավարտել ելույթները Պորտուգալիայի հավաքականում, որի կազմում հանդես է գալիս 2003 թվականից, անցկացրել է 234 խաղ ու դարձել 146 գոլի հեղինակ: «Ոսկե գնդակի» 5-ակի դափնեկիրն ազգային հավաքականներում ամենաշատ գոլ խփած ֆուտբոլիստն է պատմության մեջ:

Դավիթ Եղիազարյան