Ռոնալդուն լքել է Պորտուգալիայի հավաքականի ճամբարը և հանդես է եկել հայտարարությամբ

Սաուդյան Արաբիայի չեմպիոն «Ալ Նասրի» հարձակվող Կրիշտիանու Ռոնալդուն Դանիայի մայրաքաղաք Կոպենհագենում լքել է Պորտուգալիայի հավաքականի ճամբարը, հաղորդում է A Bola-ն։

Պորտուգալիայի հավաքականի գլխավոր մարզիչ Ժորժե Ժեզուշը նախախաղային ասուլիսում հայտնել էր, որ մտադիր չէ դանիացիների դեմ Ազգերի լիգայի երրորդ տուրի խաղում 41-ամյա ֆուտբոլիստին տեղ հատկացնել մեկնարկային կազմում:

Պորտուգալիայի հավաքականի ավագն ազգային թիմի ճամբարը լքելուց հետո հանդես է եկել հայտարարությամբ.

«Հավաքականի գլխավոր մարզիչի ասուլիսից և Պորտուգալիայի ֆուտբոլի ֆեդերացիայի նախագահի հետ զրույցից հետո որոշեցի հեռանալ հավաքականի մարզումային ճամբարից։

Հետագայում բոլոր պորտուգալացիներին կպատմեմ հեռանալուս պատճառների մասին ճշմարտությունը։ Ես միշտ նվիրված եմ հավաքականին։ Հիմա Պորտուգալիային և բոլոր թիմակիցներիս հաջողություն մաղթելու պահն է»,- սոցցանցերում գրել է Ռոնալդուն։

O Jogo-ի համաձայն՝ «Ոսկե գնդակի» 5-ակի դափնեկիրը որոշել է ավարտել ելույթները Պորտուգալիայի հավաքականում, որի կազմում հանդես է գալիս 2003 թվականից, անցկացրել է 234 խաղ ու դարձել 146 գոլի հեղինակ: Ռոնալդուն ազգային հավաքականներում ամենաշատ գոլ խփած ֆուտբոլիստն է պատմության մեջ:

Հիշեցնենք, որ Նորվեգիայի հավաքականի դեմ Ազգերի լիգայի խմբային փուլի երկրորդ տուրի խաղում (2:1) Ռոնալդուն խաղաժամանակ չէր ստացել: 18 տարվա ընթացքում առաջին անգամ լեգենդար հարձակվողն ամբողջ խաղն անցկացրել էր Պորտուգալիայի հավաքականի պահեստայինների նստարանին։ Նախորդ անգամ նման բան եղել էր Եվրո-2008-ում կայացած Պորտուգալիա – Շվեյցարիա (0:2) խաղում։

Ազգերի լիգայի առաջին տուրում Կրիշտիանու Ռոնալդուն մեկնարկային կազմում խաղացել էր Ուելսի հավաքականի դեմ ու փոխարինվել 67-րդ րոպեին:

Դավիթ Եղիազարյան