Թրամփը հրաժարվել է Քամալա Հարիսի հետ երկրորդ հեռուստաբանավեճից

Հանրապետական կուսակցությունից ԱՄՆ նախագահի թեկնածու Դոնալդ Թրամփը հրաժարվել է իր մրցակից Քամալա Հարիսի հետ երկրորդ հեռուստաբանավեճից։ Այս մասին ասվում է Թրամփի Truth Social սոցիալական ցանցում արված գրառման մեջ, գրում է DW-ի ռուսական ծառայությունը։

Թրամփը Հարիսին համեմատել է «մենամարտում պարտված բռնցքամարտիկի» հետ և, իբր, դրա համար էլ «ռևանշ է ուզում»։

«Հարցումները հստակ ցույց են տալիս, որ ես հաղթել եմ բանավեճում Քամալա Հարիսի՝ արմատական ​​ձախ դեմոկրատ թեկնածուի դեմ», – գրել է Թրամփը։

Նրանց առաջին բանավեճը տեղի էր ունեցել սեպտեմբերի 10-ին ABC-ի ուղիղ եթերում, որը դիտել է ավելի քան 67 միլիոն մարդ։ Չնայած Թրամփի պնդմանը՝ հետբանավեճային հարցումները ցույց են տալիս, որ Հարիսը նվազագույն առավելությամբ հաղթել է: Շատ փորձագետներ կիսում են նույն կարծիքը։ Սակայն դեռ պարզ չէ, թե դա ինչպես կարող է ազդել նոյեմբերի ընտրությունների արդյունքների վրա։

Այնուհետև իր գրառման մեջ Թրամփը մեղադրել է ԱՄՆ գործող նախագահ Ջո Բայդենին ու փոխնախագահ Քամալա Հարիսին՝ երկիրը «քանդելու» մեջ։ «Միլիոնավոր հանցագործներ և հոգեկան հիվանդներ լցվել են ԱՄՆ՝ բոլորովին անվերահսկելի և անօրինական, իսկ գնաճը սնանկացրել է մեր միջին խավը»,-նշել է նա՝ հավելելով․

«Քամալան պետք է կենտրոնանա այն բանի վրա, թե ինչ պետք է աներ վերջին գրեթե չորս տարվա ընթացքում։ Երրորդ բանավեճ չի լինելու»։ Թրամփը նկատի ունի այն, որ առաջինը բանավեճը անցկացրել է Ջո Բայդենի հետ, որը դեռ մրցապայքարից դուրս չէր եկել։

Հարիսը, ելույթ ունենալով Թրամփի հրապարակումից անմիջապես հետո տեղի ունեցած հանրահավաքում, ասել է «Ես կարծում եմ, որ մենք պարտավորություն ունենք ընտրողների առաջ ևս մեկ բանավեճ անցկացնելու»:

Փոխնախագահի թեկնածուները՝ դեմոկրատ Թիմոթի Ուոլզը և հանրապետական ​​Ջեյմս Դեյվիդ Վենսը, պայմանավորվել են բանավեճ անցկացնել հոկտեմբերի 1-ին։