08.10.2026 | 13:41
ՌԴ ԱԽ-ն հայտարարել է, թե ՀՀ-ում Firebird AI-ի տվյալների կենտրոնը «կարող է օգտագործվել Ռուսաստանի դեմ»
Նեթանյահուի խորհրդականը Մոսկվա է այցելել
Քաղաքականություն
02.09.2024 | 13:33
Իսրայելի վարչապետ Բենիամին Նեթանյահուի ռազմական քարտուղար Ռոման Հոֆմանն այցելել է Մոսկվա՝ քննարկելու «ՀԱՄԱՍ շարժման գրոհայինների կողմից պատանդ պահվող մարդկանց ազատելու գործարքի առաջընթացը»: Այս մասին ասված է Իսրայելի վարչապետի գրասենյակի հաղորդագրության մեջ, գրում է Meduza-ն։
Հայտարարության մեջ նշվում է, որ Նեթանյահուն զրուցել 32-ամյա Ալեքսանդր Լոբանովի ծնողների՝ Օքսանա և Գրիգորի Լոբանովների հետ։ Սեպտեմբերի 1-ին հայտնի էր դարձել, որ Գազայի հատվածում հայտնաբերվել են 6 իսրայելցի պատանդների դիերը, այդ թվում՝ Լոբանովի մարմինը։ Նա ունեցել է ՌԴ քաղաքացիություն և վաճառող է աշխատել երաժշտական փառատոնի ընթացքում, որի անցկացման վայրը հոկտեմբերի 7-ին ՀԱՄԱՍ-ի հարձակման թիրախներից էր։
Ծնողների հետ զրույցի ընթացքում Իսրայելի վարչապետը հայտնել է, որ գեներալ-մայոր Ռոման Հոֆմանը սեպտեմբերի 1-ի առավոտյան վերադարձել է Մոսկվա այցից։
«Այցի նպատակն էր խթանել պատանդների գործարքը։ Նա քննարկել է նաև Ալեքսանդր Լոբանովի և մյուս պատանդների ճակատագիրը»,- ասվում է Նեթանյահուի գրասենյակի տարածած հաղորդագրության մեջ։
Ռուսական կողմն Իսրայելի վարչապետի խորհրդականի այցի մասին տեղեկություններ չի հայտնել։
