11.08.2026 | 09:43
Արմավիրի մարզում 2026-ի առաջին կիսամյակում սպանության, սպանության փորձի և ավազակության բոլոր դեպքերը բացահայտվել են. ՆԳՆ
Գազայի հատվածում հրադադարը կապ չունի Իսրայելին Իրանի պատասխանի հետ․ Քանանի
Քաղաքականություն
19.08.2024 | 16:56
Իրանի ԱԳՆ խոսնակ Նասեր Քանանին հայտարարել է, որ Իրանը մշտապես ողջունել է Գազայում հրադադարի մասին համաձայնագիրը, սակայն այս հարցը կապ չունի Իսրայելի կողմից ՀԱՄԱՍ-ի քաղբյուրոյի ղեկավար Իսմայիլ Հանիեի սպանությանը պատասխանելու՝ Թեհրանի օրինական իրավունքի հետ, գրում է Mehr-ը։
«Հրադադարը միջազգային պահանջ է, որ ավելի քան տասը ամիս տևող սպանությունները պետք է դադարեցվեն, և այդ բանակցությունները շարունակվում են համաշխարհային պահանջի և պաղեստինյան կողմի կամքի շրջանակում»,- ասել է Նասեր Քանանին՝ պատասխանելով լրագրողների հարցերին։
Իրանը Գազայում պատերազմի դադարեցման ամենակարևոր և ամենաուժեղ միջազգային աջակիցն է, ասել է իրանցի պաշտոնյան՝ հավելելով, որ երկիրը կշարունակի աջակցել այս հարցում այլ երկրների ջանքերին։
«Բայց այս հարցը ոչ մի կապ չունի ագրեսորին պատասխանելու՝ Իրանի օրինական իրավունքի հետ։ Իրանի պաշտոնական հյուրն իրանական հողում ահաբեկչական հարձակման թիրախ է դարձել և նահատակվել: Նա հրադադարի հաստատման քաղաքական բանակցությունների գործընթացի առաջնորդն էր: Հետևաբար, [իսրայելական] ռեժիմը ցույց տվեց, որ պատրաստ չէ հետևել քաղաքական գործընթացին՝ սպանելով Հանիեին»,- ընդգծել է նա։
Ըստ Քանանիի՝ Իրանն իրավունք ունի պաշտպանելու իր անվտանգությունն ու տարածքային ամբողջականությունը՝ հիմնվելով ՄԱԿ-ի կանոնադրության վրա։
Իրանին զսպվածություն ցուցաբերելու կոչ անելը նման իրավիճակում իռացիոնալ է, եզրափակել է նա:
