11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Բրյուսելում հարձակման են ենթարկվել ՆԱՏՕ-ում Ադրբեջանի դեսպանն ու նրա կինը․ նրանցից 90,000 եվրո արժողությամբ երկու Rolex են գողացել
Քաղաքականություն
07.08.2024 | 16:34
ՆԱՏՕ-ում Ադրբեջանի դեսպան Ջաֆար Հուսեյնզադեն և նրա կինը Բրյուսելում թալանի զոհ են դարձել։ Այս մասին հայտնում է բելգիական Sudinfo-ն։
Հաղորդվում է, որ վարձակալած սկուտերով երկու գողերը հարձակվել են դեսպանի և նրա կնոջ վրա՝ ատրճանակի կոթով հարվածելով նրանց գլխին։ Հարձակման ընթացքում նրանցից խլել են երկու զույգ շքեղ Rolex ժամացույց՝ ընդհանուր 90 հազար եվրո արժողությամբ։
Ադրբեջանական լրատվամիջոցների հետ զրույցում Հուսեյնզադեն մանրամասներ է պատմել միջադեպից։
«Օգոստոսի 5-ին արձակուրդիս ժամանակ, Բրյուսելի ժամանակով 15:00-ին, այն տան դիմաց, որտեղ բնակվում եմ, 2 անհայտ անձինք հարձակվել են իմ և կնոջս վրա։ Երբ մենք մտանք շենք, այդ մարդիկ ներխուժեցին ներս, սպառնացին մեզ զենքով, դանակներով ու պահանջեցին տալ այն ամենը, ինչ ունենք»,- ասել է նա։
Դեսպանն ասել է, որ նրանք հեռացել են տարածքից՝ վերցնելով կնոջ պայուսակն ու Rolex ժամացույցները՝ թեթև վնասվածքներ հասցնելով։
«Ոստիկանությունն անմիջապես ժամանել է դեպքի վայր և հետաքննություն սկսել։ Կցանկանայի նաև նշել, որ անընդունելի է բելգիական լրատվամիջոցներում այն տան լուսանկարների հրապարակումը, որտեղ մենք ապրում ենք՝ անվտանգության նկատառումներից ելնելով։ Ափսոսանք է առաջացնում նաև այն, որ մամուլը գերագնահատել է մեր գողացված ժամացույցների արժեքը։ Չնայած Rolex էին, դրանք մետաղական էին և պարզ մոդելներ»,- ասել է Ջաֆար Հուսեյնզադեն։
Էմմա Չոբանյան
