Երբ գալիս է սեպտեմբերը՝ առանց դպրոցական համազգեստի․ նախարարի հորդորներն ու «դուխով» սպառողները. ՏԵՍԱՆՅՈՒԹ

 Դպրոցական պարտադիր համազգեստը երեխաների իրավունքի ոտնահարում է, թե՞ սոցիալական անհավասարությունը դպրոցում մեղմելու միջոց․ այս հարցի շուրջ բանավեճը սեպտեմբերի 1-ին ընդառաջ կրկին ակտուալ է։ Անկախությունից հետո հայաստանյան դպրոցներում համազգեստի հարցը, կարելի է ասել, բաց է։

Օրեր առաջ Հայաստանի կրթության և գիտության նախարար Արայիկ Հարությունյանը հայտարարեց, որ դպրոցը չի կարող որևէ հագուստ պարտադրել աշակերտին: Նա մասնավորապես անդրադարձավ սև ու սպիտակ հագուստ կրելու թեմային՝ նշելով, որ որևէ մեկին դա չի պարտադրվում և չի էլ արգելվում:

Իսկ ի՞նչ են այս մասին մտածում մեր համաքաղաքացիները:

Factor.am-ի հարցման ընթացքում պարզ դարձավ, որ նրանց մի մասը այն կարծիքին է, որ համազգեստը անհրաժեշտություն է՝ դպրոցներում սոցիալական անհավասարության դրսևորումներից խուսափելու համար, իսկ մյուս մասն էլ համազգեստը համարում է աշակերտների ազատության սահմանափակում:

Կրթության և գիտության նախարարության հանրակրթության վարչության պետ Աշոտ Արշակյանը, սակայն, այն համոզման է, որ համազգեստ կրելով դպրոցներում սոցիալական հավասարությանն առնչվող ոչ մի խնդիր չի լուծվում: Նախարարության ներկայացուցիչը շեշտում է՝ համազգեստ կրել-չկրելը որևէ ազդեցություն չի ունենում նաև ո՛չ ուսման որակի, ո՛չ էլ աշակերտների կարգապահության վրա:

Ի դեպ, վերջին շրջանում շուկայում հայտնվել են դպրոցականների համար նախատեսված թավշյա հեղափոխության խորհրդանիշներով և որ առավել հաճախ է հանդիպում՝ «Դուխով» տարբերանշանով հագուստ և գրենական պիտույքներ:

Այս առթիվ հանրության շրջանում բուռն քննարկումներ եղան, շատերը տեսակետ հայտնեցին, որ եթե երեխաները նման պարագաներով ներկայանան դասապրոցեսին, դպրոցները պարզապես կքաղաքականացվեն: Շատերի պնդմամբ էլ ցանկալի չէ նաև ոչ հայերեն և, այսպես ասած, «տղայական» լեզվին բնորոշ «Դուխով» բառի այդչափ տարածումը աշակերտների շրջանում:

Օրեր առաջ այս կոնտեքստում դպրոցների քաղաքականացման թեմային ֆեյսբուքյան տիրույթում արձագանքեց կրթության և գիտության նախարար Արայիկ Հարությունյանը՝ հորդորելով չգնել հեղափոխության խորհրդանիշներով դպրոցական պարագաներ. մեր ուսումնասիրությունները, սակայն, ցույց տվեցին, որ, չնայած բոլոր հորդորներին, «Դուխով» տարբերանշանով դպրոցական պարագաները շարունակվում են վաճառվել և սպառվել:

Մանրամասները՝ տեսանյութում։

Աննա Բաբաջանյան