12.10.2026 | 16:44
Լավրովը հայտարարել է, թե Զելենսկին «արժանի չէ մարտի դաշտում դադարի»
Ադրբեջանում 37 մարդ է ձերբակալվել դպրոցներում հիջաբի արգելքի դեմ բողոքի ցույցերի հետ կապված
Քաղաքականություն
12.10.2026 | 16:19
Ադրբեջանում արձանագրվել են հասարակական կարգի կոպիտ խախտման դեպքեր՝ կապված կառավարության համապատասխան որոշմամբ սահմանված՝ պետական հանրակրթական հաստատություններում դպրոցական միասնական համազգեստի ներդրման կանոնների կիրառման հետ։
Ադրբեջանի Ներքին գործերի նախարարության (ՆԳՆ) մամուլի ծառայությունից հայտնել են, թե Բաքվում մի խումբ անձինք դպրոցական միասնական համազգեստի կանոնների ներդրման կապակցությամբ կոնֆլիկտային իրավիճակներ են ստեղծել կրթական հաստատությունների աշխատակիցների հետ, վնաս են հասցրել պետական կրթական հաստատություններին, ինչպես նաև փորձել են կատարել այնպիսի գործողություններ, որոնք կոպտորեն խախտում են հասարակական կարգը, խոչընդոտում տրանսպորտի երթևեկությանը և ուսումնական հաստատությունների բնականոն գործունեությանը։
Դեպքի առթիվ ՆԳՆ համապատասխան քննչական ստորաբաժանումներում քրեական գործ է հարուցվել Քրեական օրենսգրքի 233-րդ հոդվածով՝ հասարակական կարգի խախտման հանգեցրած գործողությունների կազմակերպում կամ դրանցում ակտիվ մասնակցություն։ Գործի շրջանակում ձերբակալվել է 37 մարդ։
Նշվում է, որ ձեռնարկվող միջոցառումների հիմնական նպատակն է ապահովել օրենսդրության պահանջների կատարումը, կանխել հասարակական կարգի խախտումները, տրանսպորտի երթևեկության և կրթական հաստատությունների բնականոն աշխատանքի խոչընդոտումը, ինչպես նաև ապահովել աշակերտների, մանկավարժների և այլ քաղաքացիների անվտանգությունը։
Հայտարարության մեջ նշվում է, որ քաղաքացիները պարտավոր են պահպանել օրենսդրության պահանջները, թույլ չտալ հասարակական կարգի խախտումներ, այլ անձանց իրավունքներին և օրինական շահերին վնաս պատճառող գործողություններ, ինչպես նաև ենթարկվել ոստիկանության աշխատակիցների օրինական պահանջներին։ Ընդգծվում է, որ հասարակական կարգի և անվտանգության ապահովման, ինչպես նաև կրթական հաստատությունների բնականոն գործունեության պահպանմանն ուղղված միջոցառումները շարունակվում են։
Հավելենք, որ այսօր առավոտից Ադրբեջանի տարբեր բնակավայրերի դպրոցներում բողոքի ակցիաներ են տեղի ունենում աշակերտների ու ուսուցիչների կողմից՝ ուսումնական հաստատություններում հիջաբի կրման արգելքի դեմ։
Թարգմանությունը՝ Էմմա Չոբանյանի
