Միլիոններ՝ նորաստեղծ ընկերություններին․ ովքեր են ապահովում պաշտոնյաների ուղևորափոխադրումները․ ՏԵՍԱՆՅՈՒԹ

Պետական գերատեսչությունները միլիոնավոր դրամներ են ծախսում տրանսպորտային փոխադրումների ծառայություններ ձեռք բերելու համար։ Եթե որոշ գերատեսչություններ վարձակալում են ավտոբուսներ՝ աշխատողներին աշխատանքի տանել-բերելու համար, ապա այլք վարձակալում են ներկայացուցչական դասի ավտոմեքենաներ պաշտոնյաների և հյուրերի տեղափոխումն ապահովելու համար։

Գնումների էլեկտրոնային համակարգի ուսումնասիրությամբ Factor.am-ը պարզեց, որ 2023 թ-ից «էլիտար» փոխադրումներով սկսել է զբաղվել «Բլեք մոթոր» ՍՊԸ-ն։ Պետական ռեգիստրում այն գրանցվել է 2023 թ-ի մայիսի 23-ին և օրեր անց՝ հունիսի 5-ին, ՀՀ արտաքին գործերի նախարարության հետ պայմանագիր է կնքել մեկ անձից գնման ընթացակարգով։ Այսինքն՝ ԱԳՆ-ն ուղիղ ձևով ծառայություն է գնել փոխադրումների ոլորտում որևէ փորձառություն չունեցող ընկերությունից։

Մինչ օրս նախարարությունները «Բլեք մոթոր»-ի հետ կնքել են ընդհանուր 21 մլն 92 հազար դրամի պայմանագրեր՝ բոլորը մեկ անձից գնման ընթացակարգով։ Վերջին պայմանագիրը ապրիլի 2-ին ՀՀ բարձր տեխնոլոգիական արդյունաբերության նախարարության հետ է՝ 1 մլն 240 հազար դրամ արժողության։

Հետաքրքրական է, որ «Բլեք մոթոր»-ի մասին համացանցում տվյալներ չկան․ ընկերությունը չունի կայք, ներկայացված չէ տեղեկատվական համակարգերում, սոցիալական ցանցերում։ Ընկերությունը չունի նույնիսկ գրասենյակ․ գրանցված է տնօրենի՝ 28-ամյա Լուսինե Ավագյանի բնակարանում, Նոր Նորքի 5-րդ զանգվածի ոչ էլիտար շենքերից մեկում։ Առավել ուշագրավ է, որ Զինծառայողների ապահովագրության ազգային հիմնադրամից ստացված տվյալներով  ընկերությունն ունի առավելագունը 3 աշխատող, բայց կարողանում է նման ծավալի ծառայություններ մատուցել պաշտոնյաներին։

Ուղևորափոխադրումների առավել մեծածավալ ծառայություններ գերատեսչություններին մատուցում է «ԷԼԻՏԲԱՍ» ընկերությունը․ 2023 թ-ից մինչ օրս կնքված պայմանագրերի արժեքը 32 մլն դրամ է։ 2008 թ-ին հիմնադրված այս ընկերության 50/50 սեփականատերերը Գուրգեն Նիկողոսյանն ու Անի Սարգսյանն են։ Վերջինս ՀՀ նախկին նախագահ Սերժ Սարգսյանի եղբոր՝ Լյովա Սարգսյանի դուստրն է։ Ընկերության տվյալներում որպես իրական շահառու նշված է նրա եղբայրը՝ Նարեկ Սարգսյանը։ «ԷԼԻՏ ԲԱՍ»-ը առավելապես զբաղվում է պետաշխատողներին ավտոբուսներով աշխատանքի տեղափոխելով։ Ընկերության այս ծառայությունից օգտվում են հիմնականում Ներքին գործերի նախարարությունը, Պետական եկամուտների կոմիտեն, ԱՆ Հարկադիր կատարումն ապահովող ծառայությունը և այլն։

Factor TV-ն ավելի վաղ պարզել էր, որ «Էլիտբաս» ընկերության հետ ՆԳՆ-ն 2020-2024 թվականների ընթացքում  20 պայմանագիր է կնքել և վճարել ընդհանուր 610 մլն դրամ, որպեսզի ապահովի կարմիր ու սև բերետավորների, ոստիկանության այլ ծառայողների տեղափոխությունը վարչապետ Նիկոլ Փաշինյանի այցերի ժամանակ։ 

Գերատեսչություններին ուղևորափոխադրման ծառայություններ 2023 թ-ից մատուցում է նաև «Յամա տուր» ՍՊԸ-ն՝ առանց մրցույթների՝ մեկ անձից։ Մինչ օրս կքնված պայմանագրերի ծավալը կազմել է մոտ 17․3 մլն դրամ։ Ընկերությունը հիմնադրվել է 2018 թ-ի հուլիսին, սեփականատերը Սամվել Պետրոսյանն է։

Ուշագրավ է նաև ոլորտի նորեկ՝ «Էլիտ քար սերվիս» ընկերության գործունեությունը։  2023 թ-ի դեկտեմբերի 5-ին հիմնադրված ընկերությունն ընդամենը 20 օր անց՝ դեկտեմբերի 25-ին, իր առաջին պայմանագիրն է կնքել կրկին Արտաքին գործերի նախարարության հետ՝ 280 հազար դրամ արժեքով։ Ընդ որում՝ մինչ օրս ընկերությունը հասցրել է կնքել ուղևորափոխադրումների 11 պայմանագրեր՝ բոլորը ԱԳՆ-ի հետ և բոլորը մեկ անձից գնման ընթացակարգով՝ ընդհանուր 2 մլն 52 հազար դրամի։ «Էլիտ քար սերվիս»-ի հիմնադիրը 28-ամյա Ինգա Հարությունյանն է։ Այս ընկերությունն ունի գրանցված ընդամենը 1 աշխատող։

Գայանե Խաչատրյան