Ազգերի լիգա. Հայաստանի հավաքականը պարտվեց Կիպրոսին. ՏԵՍԱՆՅՈՒԹ

Ֆուտբոլի Ազգերի լիգայի խմբային փուլի երրորդ տուրում Հայաստանի ազգային հավաքականը մրցակցի խաղադաշտում 0:2 հաշվով պարտվեց Կիպրոսի հավաքականին:

Նիկոսիայի GSP մարզադաշտում կայացած խաղում Կիպրոսի հավաքականը երկու գոլերն էլ խփեց առաջին խաղակեսում։ Հանդիպման հաշիվը 19-րդ րոպեին բացեց Կիպրոսի հավաքականի պաշտպան Լեոնիդաս Կոնոմիսը՝ անկյունայինի խաղարկման արդյունքում օգտվելով դարպասապահ Արսեն Բեգլարյանի կոպիտ սխալից (տեսանյութ):

12 րոպե անց դաշտի տերերն օգտվեցին Հայաստանի հավաքականի ևս մեկ սխալից և հակագրոհի արդյունքում խփեցին երկրորդ գոլը: Աչքի ընկավ հարձակվող Անդրոնիկոս Կակուլիսը (տեսանյութ)

Երկրորդ խաղակեսի սկզբնամասում դաշտի տերերը մնացին 10 խաղացողով, սակայն Հայաստանի հավաքականին չհաջողվեց օգտվել թվային առավելությունից։ 51-րդ րոպեին կոպիտ խաղի համար կարմիր քարտ ստացավ Կոստաս Պիլեասը (տեսանյութ):

C Լիգայի երկրորդ խմբի մյուս խաղում Չեռնոգորիայի հավաքականը 2:1 հաշվով արտագնա հաղթանակ տարավ Լատվիայի թիմի նկատմամբ։

Երրորդ տուրից հետո Չեռնոգորիան 9 միավորով խմբի առաջատարն է, Կիպրոսն ունի 4 միավոր, Հայաստանը` 3, իսկ Լատվիան` 1:

Եղիշե Մելիքյանի գլխավորած թիմը հաջորդ հանդիպումը կանցկացնի հոկտեմբերի 5-ին՝ հյուրընկալվելով խմբի առաջատար Չեռնոգորիայի հավաքականին։ Ազգերի լիգայի մեկնարկային երկու տուրերում Հայաստանի հավաքականը հաղթել էր Լատվիային (2:0) ու պարտվել Չեռնոգորիային (2:3):

Ազգերի լիգա, C լիգա, երրորդ տուր

Երկրորդ խումբ

Կիպրոս – Հայաստան՝ 2:0

Լեոնիդաս Կոնոմիս, 19, Անդրոնիկոս Կակուլիս, 31

Հեռացում` Կոստաս Պիլեաս, 52 (Կիպրոս)

Դավիթ Եղիազարյան