Բաքուն պնդում է՝ «Սումգայիթը կազմակերպել է Հայաստանը»

Պաշտոնական Բաքուն արձագանքել է ՀՀ ԱԳՆ-ի հայտարարությանը նվիրված Ադրբեջանի Սումգայիթ քաղաքում իրականացված հայերի ջարդերի 36-րդ տարելիցին։

Ադրբեջանի ԱԳՆ-ն հերթական անգամ զբաղվելով փաստերի խեղաթյուրմամբ՝ հայտարարում է,  թե, իբր, «Բաքվի հասցեին արված պնդումները լիովին անհիմն են և ներկայացնում են պատմական փաստերի խեղաթյուրում և կեղծում»։

«Այս հայտարարությունը Հայաստանի կողմից փորձ է թաքցնելու բռնի գործողությունները, որոնք սկսվել են անցյալ դարի 80-ականների վերջին՝ նպատակ ունենալով անհիմն և անօրինական տարածքային պահանջներ ներկայացնել Ադրբեջանին, Հայաստանի տարածքում բնակվող ադրբեջանական բնակչության զանգվածային տեղահանումը, ահաբեկչությունը ադրբեջանական ժողովրդի նկատմամբ, էթնիկ հողի վրա սադրանքները և ռազմական ուժի կիրառումը»,-ասվում է Ադրբեջանի ԱԳՆ խոսնակ Այխան Հաջիզադեի հայտարարության մեջ։

Բաքուն  պատմական փաստերը կեղծելու ու խեղաթյուրելու գործում ավելի հեռուն է գնում ու հայերի ջարդերը կազմակերպելու մեջ մեղադրում Հայաստանին։

«Ցանկանում ենք հիշեցնել, որ էթնիկ հողի վրա Սումգայիթում տեղի ունեցած անկարգությունները ԽՍՀՄ-ի և Հայաստանի ղեկավարության, հայ շովինիստ գաղափարախոսների և ծայրահեղական կազմակերպությունների կողմից նախապես մտածված և ծրագրված նպատակաուղղված սադրանքների մի մասն էին»-ասվում է հայտարարությունում։

Հավելենք, որ ՀՀ ԱԳՆ-ն իր հայտարարության մեջ նշել էր, որ  միջազգային հանրությունը պետք է համարժեք գնահատական տա տեղի ունեցած զանգվածային ոճրագործություններին և գործարկի առկա բոլոր մեխանիզմները՝ կանխելու նման ոճրագործությունների կրկնությունը և նպաստելու Հարավային Կովկասում արժանապատիվ և տևական խաղաղության հասնելու Հայաստանի անկեղծ ջանքերին։

«1988թ. փետրվարի 27-ին Խորհրդային Ադրբեջանի ղեկավարության նախաձեռնությամբ և բացարձակ թողտվության պայմաններում մեկնարկեցին Սումգայիթի հայ բնակչության ջարդերը, որոնք ուղեկցվեցին բռնությունների, դաժանությունների, բռնի անհետացումների, ունեզրկման, մարդու իրավունքների զանգվածային ոտնահարումների դեպքերով: Սպանվեցին հարյուրավոր հայեր, այդ թվում՝ կանայք, երեխաներ և ծերեր, իսկ հազարավոր հայեր բռնի տեղահանվեցին: Սումգայիթյան ողբերգությանը հաջորդեցին Կիրովաբադի, Բաքվի և Ադրբեջանի այլ հայաշատ բնակավայրերի հայության ջարդերը: Այս շղթայական իրադարձությունները, ինչպես դրանցից առաջ Նախիջևանի ամբողջական հայաթափումը, ցույց տվեցին, որ հիշյալ ոճրագործությունները ոչ թե ազգայնամոլության հիմքի վրա բռնությունների առանձին դրվագներ էին, այլ պետականորեն ծրագրված և իրականացված հայատյացության քաղաքականության հերթական դրսևորումներ։ Այդ քաղաքականության հետևանքով Խորհրդային Ադրբեջանից բռնի տեղահանման ենթարկվեց շուրջ 500 հազար էթնիկ հայ: Հատկանշական է, որ այդ իրադարձությունները թիրախավորել են ոչ միայն հայ բնակչությանը. դրանք ուղեկցվել են նաև հայկական ժառանգության և ընդհանուր առմամբ հայկական հետքի վերացման կանխամտածված գործողություններով»,-ասվում է հայտարարության մեջ։

Պաշտոնական Երևանը շեշտում է, որ  արդեն 21-րդ դարում, լիակատար անպատժելիության պայմաններում Ադրբեջանի նույն քաղաքականության շարունակությունն էր Լեռնային Ղարաբաղի բնիկ հայության ահաբեկման, անմարդկային շրջափակման, սովամահության մատնելու և ի վերջո ուժի կիրառման միջոցով Լեռնային Ղարաբաղն ամբողջությամբ հայաթափելու, էթնիկ զտման ենթարկելու քաղաքականությունը, որն ավարտին հասցվեց անգամ ի հեճուկս ՄԱԿ Արդարադատության միջազգային դատարանի կողմից ընդունված իրավաբանական պարտադիր ուժ ունեցող երեք որոշումների:

«Այսօր էլ Ադրբեջանը շարունակում է իր վերահսկողության ներքո հայկական որևէ հետքի վերացմանն ուղղված քաղաքականությունը՝ պղծելով, վանդալիզմի ենթարկելով և ոչնչացնելով հայկական կրոնական ու պատմամշակութային կոթողները։ Այսօր էլ, արդեն Հայաստանի Հանրապետության դեմ շարունակվող այլատյաց և թշնամական քաղաքականությունն ուղեկցվում է բարձրագույն մակարդակով հնչող ատելության խոսքով, սպառնալիքներով և ագրեսիվ հռետորաբանությամբ, որը խոչընդոտ է ժողովուրդների միջև թշնամանքի հաղթահարման և տարածաշրջանում խաղաղության և կայունության հաստատման ճանապարհին»,-նշում է ՀՀ ԱԳՆ-ն։

Էմմա Չոբանյան